Душанбе, 1-уми феврали соли 2022

Тибқи нақшаи фаъолияти Маркази миллии тестии назди Президенти Ҷумҳурии Тоҷикистон (Марказ) дар ҳамкорӣ бо Вазорати маориф ва илми Ҷумҳурии Тоҷикистон (фармоиши вазири маориф ва илми Ҷумҳурии Тоҷикистон аз 10-уми январи соли 2022, № 15) аз 1-уми феврал то 12-уми марти соли 2022 дар муассисаҳои таълимии таҳсилоти умумии асосӣ, миёнаи умумӣ, ибтидоӣ ва миёнаи касбии шаҳру ноҳияҳои ҷумҳурӣ вохӯриҳои кормандони Марказ бо хатмкунандагон, падару модарон, омӯзгорон ва алоқамандон оид ба низоми имтиҳонҳои марказонидаи дохилшавӣ дар соли 2022 ба нақша гирифта шудааст.

Бо фармоиши директори Марказ 25 нафар корманди Марказ барои ташкилу баргузории вохӯриҳо аз 1-ум то 9-уми феврали соли ҷорӣ ба 68 шаҳру ноҳияи ҷумҳурӣ сафарбар карда мешаванд. Тибқи нақша, дар давоми 9 рӯз аз тарафи кормандони Марказ дар 173 муассисаи таълимӣ вохӯриҳо доир мегарданд.

Дар баробари ин, кормандони Марказ ҳангоми сафари хизматӣ ба шаҳру ноҳияҳои ҷумҳурӣ барои ошноӣ пайдо кардани кормандони мақомотҳои иҷроияи ҳокимияти давлатӣ ва раёсату шуъбаҳои маорифи шаҳру ноҳияҳои ҷумҳурӣ бо кормандони ин муассисаҳо суҳбат карда, маводди иттилоотию методӣ, аз ҷумлаи дастури иттилоотию методии “Роҳнамои довталаб” ва маҷмӯаи саволу масъалаҳои тестро дастраси онҳо менамояд.

Инчунин, барои шиносоӣ пайдо кардани ҷомеаи шаҳру ноҳияҳои ҷумҳурӣ аз тарафи Марказ маводди иттилоотию методӣ ба китобхонаҳо тақдим карда мешаванд, ки зиёда аз 600 маҷмӯаро ташкил медиҳад.

Бояд қайд намуд, ки дар давоми моҳҳои феврал-марти соли ҷорӣ дар 3732 муассисаи таълимии шаҳру ноҳияҳои ҷумҳурӣ аз тарафи таблиғгарони сатҳи ҷумҳурӣ оид ба низоми ИМД вохӯриҳо доир мегардад, ки тибқи маълумотҳои пешакӣ дар онҳо зиёда аз 150000 нафар хатмкунанда иштирок хоҳанд кард.