Душанбе, 20-уми октябри соли 2020

Бо мақсади шинос кардани алоқамандони низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон Маркази миллии тестии назди Президенти Ҷумҳурии Тоҷикистон (Марказ) дар ҳамкорӣ бо Вазорати маориф ва илми Ҷумҳурии Тоҷикистон имтиҳонҳои озмоиширо тибқи тарҳи нави маҷмӯи фанҳои имтиҳонии низоми мазкур баргузор мекунад.

Бояд тазаккур дод, ки имтиҳонҳои озмоишии мазкур бо иштироки хатмкунандагони муассисаҳои таълимии таҳсилоти миёнаи умумии 55 шаҳру ноҳияи ҷумҳурӣ моҳҳои октябр-декабри соли 2020 ба нақша гирифта шудааст.

Дар давоми 3 рӯз - аз 19-ум то 21-уми октябри соли ҷорӣ дар шаҳри Норак ва ноҳияҳои Ёвону Абдураҳмони Ҷомии вилояти Хатлон бо иштироки 808 нафар хатмкунандаи муассисаҳои таълимии шаҳру ноҳияҳои мазкур гузаронидани имтиҳонҳои озмоишӣ дар назар гирифта шудааст.

Бояд қайд кард, ки тибқи хоҳиши хатмкунандаҳои муассисаҳои таълимӣ шумораи иштирокдорони озмоиш аз рӯйи гурӯҳи ихтисосҳо чунин хоҳад буд:

- гурӯҳи ихтисосҳои 1-ум (табиӣ ва техникӣ) – 124 нафар хатмкунанда;

- гурӯҳи ихтисосҳои 2-юм (иқтисод ва география) – 145 нафар хатмкунанда;

- гурӯҳи ихтисосҳои 3-юм (филология, педагогика ва санъат) – 180 нафар хатмкунанда;

- гурӯҳи ихтисосҳои 4-ум (ҷомеашиносӣ ва ҳуқуқ) – 93 нафар хатмкунанда;

- гурӯҳи ихтисосҳои 5-ум (тиб, биология ва варзиш) – 266 нафар хатмкунанда.

Имтиҳонҳои озмоишӣ аз тарафи кормандон ва мутахассисони Марказ гузаронида мешаванд. Варақаҳои ҷавобҳои ҳар як иштирокдори озмоиш дар Марказ ба таври автоматӣ коркард шуда, натиҷаи он ба раёсату шуъбаҳои маорифи шаҳру ноҳияҳо равона карда мешавад.

Мақсад аз гузаронидани озмоиши мазкур, пеш аз ҳама, шиносоии хатмкунандагон бо тарҳи нави маҷмӯи фанҳои имтиҳонӣ, дарки масъулият дар вақти супоридани имтиҳонҳои воқеӣ ва огоҳ шудан аз навъи саволу масъалаҳои тест вобаста ба фанҳои имтиҳонӣ ва талаботи дигар мебошад.