Имрӯз, 27-уми октябр Маркази миллии тестии назди Президенти Ҷумҳурии Тоҷикистон дар ҳамкорӣ бо Вазорати маориф ва илми Ҷумҳурии Тоҷикистон имтиҳони озмоиши тарҳи нави маҷмӯи фанҳои имтиҳонии низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ дар ноҳияи Рӯдакӣ баргузор кард.

Дар имтиҳонҳои озмоишӣ 196 хатмкунанда аз 4 муассисаи таълимии таҳсилоти миёнаи умумии ноҳия иштирок намуданд.

Мақсад аз гузаронидани озмоиши мазкур, пеш аз ҳама, шиносоии хатмкунандагон бо тарҳи маҷмӯи фанҳои имтиҳонӣ, дарк кардан ва пайдо намудани масъулият дар вақти супоридани имтиҳонҳои воқеӣ ва шинос шудан ба таркиби саволу масъалаҳои тест вобаста ба фанҳои имтиҳонӣ мебошад.

Инчунин, дар давоми 4 рӯз - аз 27-ум то 30-юми октябри соли ҷорӣ аз тарафи кормандон ва мутахассисони Марказ дар шаҳрҳои Роғуну Истиқлол ва ноҳияи Ҷаббор Расулов бо иштироки 498 нафар хатмкунандагони муассисаҳои таълимӣ имтиҳонҳои озмоишӣ ташкил ва баргузор мешавад.

 Маврид ба ёдоварист, ки Маркази милли тестӣ соли сеюм аст, ки барои хатмкунандагони кишвар ин таҷрибаро гузаронида истодааст. Тибқи нақшаи ММТ дар давоми моҳҳои октябр-декабри соли 2021 дар 60 шаҳру ноҳияи интихобшуда бо иштироки зиёда аз 20000 нафар хатмкунандаи муассисаҳои таълимии таҳсилоти миёнаи умумӣ имтиҳони озмоишӣ гузаронида мешавад.

То имрӯз аллакай дар байни ду муассисаи таълимии таҳсилоти миёнаи умумии шаҳри Душанбе бо иштироки 240 нафар хамткунанда имтиҳонҳои озмоишӣ гузаронида шуд ва натиҷаҳои онҳо коркарду ба иштирокдорон дастрас карда шуд.

Бояд қайд намуд, ки дар мувофиқа бо муассисаҳои таълимӣ хатмкунандагон ба панҷ гурӯҳи ихтисосҳо тақсимот шудаанд:

- гурӯҳи ихтисосҳои 1-ум - табиӣ ва техникӣ;

- гурӯҳи ихтисосҳои 2-юм - иқтисод ва география;

- гурӯҳи ихтисосҳои 3-юм - филология, педагогика ва санъат;

- гурӯҳи ихтисосҳои 4-ум ҷомеашиносӣ ва ҳуқуқ.

- гурӯҳи ихтисосҳои 5-ум ҷомеашиносӣ ва ҳуқуқ.