Имрӯз дар маҷлисгоҳи Маркази миллии тестии назди Президенти Ҷумҳурии Тоҷикистон даври аввали курси шиносоӣ бо низоми ИМД барои соли 2022 бо иштироки 109 нафар корманди муваққатии Марказ оғоз ёфт. Ин кормандон аз намояндагони сарраёсат, раёсату шуъбаҳои маорифи шаҳру ноҳияҳои водии Ҳисор ва шаҳри Душанбе ҳастанд, ки Марказ бо онҳо шартномаи корӣ бастааст.

Тибқи нақша дар доираи 7 дарси пешбинишуда давоми 2 рӯз доир ба талаботу қоидаҳои муқарраршуда барои бақайдгирии довталабон ва мавзӯъҳои дигари дахлдор машғулиятҳо сурат мегиранд.

Инчунин, дар даври аввал барои таблиғгарони шаҳру ноҳияҳои Вилояти Мухтори Кӯҳистони Бадахшон аз 17-ум то 18-уми январи соли 2022 (шаҳри Хоруғ ба таври фосилавӣ ва бархат (онлайн) аз шаҳри Душанбе), ноҳияҳои минтақаи Рашт аз 17-ум то 18-уми январи соли 2022 (ноҳияи Рашт ба таври фосилавӣ ва бархат (онлайн) аз шаҳри Душанбе), шаҳру ноҳияҳои водии Вахши вилояти Хатлон аз 20-ум то 21-уми январи соли 2022 (шаҳри Бохтар), шаҳру ноҳияҳои минтақаи Кӯлоби вилояти Хатлон аз 20-ум то 21-уми январи соли 2022 (шаҳри Кӯлоб) ва шаҳру ноҳияҳои вилояти Суғд аз 20-ум то 21-уми январи соли 2022 (шаҳри Хуҷанд) семинарҳои омӯзишӣ доир мегардад.

Дар анҷоми курси шиносоӣ донишҳои азхудкардаи иштирокдорони сатҳи аввал вобаста ба мавзӯъҳои пешниҳодшудаи барномаи омӯзишӣ аз тариқи тест санҷида мешавад.

Қобили зикр аст, ки Марказ дар ҳамкорӣ бо Вазорати маориф ва илми Ҷумҳурии Тоҷикистон ҷиҳати омӯзонидани таблиғгарони низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ дар соли 2022 ва омодасозии онҳо барои сари вақт огоҳ намудани ҷомеа, бахусус омӯзгорону хатмкунандагони муассисаҳои таълимии таҳсилоти миёнаи умумӣ ва ибтидоию миёнаи касбӣ бо тартиби ИМД курси шиносоиро дар се сатҳ (давр): ҷумҳуриявӣ, шаҳрию ноҳиявӣ ва муассисаҳои таълимӣ ташкилу баргузор менамояд.