Душанбе, 1-уми марти соли 2016
Даври асосии бақайдгирии довталабон барои иштирок дар имтиҳонҳои марказонидаи дохилшавӣ (ИМД) ба муассисаҳои таълимии таҳсилоти миёна ва олии касбии ҷумҳурӣ дар соли 2016 шурӯъ гардид. Дар асоси таҳлилҳо оид ба шумораи умумии хатмкунандагони муассисаҳои таълимии таҳсилоти миёнаи умумӣ, таҳсилоти ибтидоӣ ва миёнаи касбӣ дар соли 2016 бо мақсади таъмини дастрасии хоҳишмандон барои аз қайд гузаштан дар 26 шаҳру ноҳияи интихобии ҷумҳурӣ 28 нуқтаи доимии бақайдгирӣ таъсис дода шуда, дар 20 шаҳру ноҳияи кишвар нуқтаҳои сайёр фаъолият хоҳанд кард.
Бақайдгирӣ то 15-уми апрел идома ёфта, дар ин муҳлат хоҳишмандон, ки тибқи тартиби муқарраргардида барои иштирок кардан дар ИМД ҳуқуқ доранд, метавонанд ба яке аз нуқтаҳои бақайдгирии барояшон наздик ҳозир шуда, бо пешниҳоди ҳуҷҷатҳои зарурӣ аз қайд гузаранд. Хотиррасон менамоем, ки новобаста аз макони зист, довталаб имкон дорад, ки дар ҳар нуқтаи бақайдгирии барояш наздик сабти ном шавад.
Ба диққати шахсоне, ки дар ИМД-2016 иштирок кардан мехоҳанд ва дигар алоқамандони имтиҳонҳои мазкур мерасонем, ки яке аз ҳуҷҷатҳои зарурӣ барои пешниҳод ҳангоми бақайдгирӣ расиди пардохти маблағ дар яке аз филиалҳои Бонки давлатии амонатгузории Ҷумҳурии Тоҷикистон “Амонатбонк” аст. Рӯйхати филиалҳои Амонатбонк бо нишон додани суроғаҳои онҳо дар сомонаи Марказ ҷой дода шудааст.
Ёдрас менамоем, ки довталаб дар доираи як гурӯҳи ихтисосҳо ҳуқуқи то 12 комбинатсияи ихтисосҳоро вобаста аз муассисаҳои таълимӣ, шакли таҳсил (рӯзона, ғоибона, шабона, фосилавӣ) ва намуди таҳсил (ройгон, пулакӣ) интихоб кардан дорад. Соли ҷорӣ ба 33 муассисаи таҳсилоти олии касбӣ ва 26 муассисаи таҳсилоти миёнаи касбӣ ба воситаи низоми ИМД донишҷӯён қабул карда мешаванд. Ҳамчунин ба низом 25 гурӯҳи мақсадноки коллеҷҳои тиббӣ дохил гардид.
Ба шахсоне, ки барои иштирок дар ИМД-2016 аз қайд гузаштан мехоҳанд, тавсия медиҳем, ки ҳангоми бақайдгирӣ дар интихоби ихтисосҳо, муассисаҳои таълимӣ, шакл ва намуди таҳсил, ҷобаҷогузории бартарии интихобҳо (яъне дар ҷойи 1‑ум гузоштани комбинатсияи ихтисоси аз ҳама бештар писандида ва ба ҳамин тартиб то 12‑ум), забон ва макони имтиҳонсупорӣ, макони ирсоли даъватнома ва ғайра ба хато роҳ надиҳанд ва пеш аз ҳозир шудан ба нуқтаи бақайдгирӣ интихобҳои худро муайян кунанд. Ба падару модарон низ муроҷиат менамоем, ки ҳангоми ихтисосҳо, муассисаҳои таълимӣ, шакл ва намуди таҳсилро интихоб кардани фарзандонашон бетараф набошанд.
Маълумоти муфассалро дар бораи бақайдгирӣ, муассисаҳои таълимии ба низоми ИМД дохилшуда ва дигар раванду марҳалаҳои имтиҳонҳои мазкур метавон аз дастури иттилоотию методии “Роҳнамои довталаб”, ки дар сомонаи Марказ ҷойгир карда шудааст, дастрас кард.
