Душанбе, 7-уми июни соли 2019
Дар доираи корҳои омодагӣ барои гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ дар соли 2019 Маркази миллии тестии назди Президенти Ҷумҳурии Тоҷикистон семинарҳои омӯзиширо барои кормандони муваққатӣ: роҳбар ва ёвари роҳбари маркази имтиҳонӣ, маъмур ва маъмури калони имтиҳон, бақайдгирандаи маркази имтиҳонӣ оғоз кард.
Семинарҳои омӯзишӣ аз 6-ум то 15-уми июни соли 2019 дар 18 шаҳру ноҳияи ҷумҳурӣ (26 нуқта) гузаронида мешавад. Мувофиқи эълон барои иштирок дар семинарҳои омӯзишӣ 4558 нафар хоҳишманд ҳуҷҷат супорида буданд. Баррасии ҳуҷҷатҳои пешниҳодкардаи хоҳишмандон аз тарафи раёсати кадрҳо, коргузорӣ ва иттилооти Марказ маълум кард, ки ҳуҷҷатҳои 3568 нафар хоҳишманд мувофиқи талаботи муқарраршуда пешниҳод карда шудаанд.
Баррасии мувофиқати номзадон ба талаботи тахассусии муқарраршуда аз рӯйи ҳуҷҷатҳояшон, ки аз ҷониби раёсати ташкил ва идораи имтиҳони Марказ гузаронида шуд, муайян кард, ки ба 2746 нафар довталаби барои кор ариза пешниҳодкарда барои ширкаташон дар семинарҳои омӯзишӣ иҷозат дода шавад.
Шунавандагони семинар (2746 нафар) аз рӯйи панҷ гурӯҳи зерини вазифаҳо тақсим карда шуданд, ки ба онҳо 32 нафар тренер (ҳамчун корманди муваққатӣ) ва 21 нафар корманди доимии Марказ дарс медиҳанд: 1) роҳбари маркази имтиҳонӣ, 2) ёвари роҳбари маркази имтиҳонӣ, 3) маъмури калони имтиҳон, 4) маъмури имтиҳон, 5) бақайдгирандаи маркази имтиҳонӣ.
Ҳайати гурӯҳи корӣ пас аз ду рӯзи дарсӣ ба шунавандагон дар асоси дарсҳои омӯхтаашон (бо такя ба барнома, модули омӯзишӣ ва маводи иловагии ёрирасон) саволномаҳо пешниҳод карда, баъди арзёбии донишу маҳорати шунавандагон дар асоси талаботу принсипҳои муқарраршуда аз байни онҳо қариб 2000 нафарро тибқи вазифаҳои номбурда интихоб ва ба кори муваққатӣ дар Марказ ҷалб мекунанд.
Лозим ба зикр аст, ки тибқи фармоиши вазири маориф ва илми Ҷумҳурии Тоҷикистон дар 18 шаҳру ноҳияи ҷумҳурӣ 47 маркази имтиҳонӣ ташкил карда мешавад. Фаъолияти марказҳои имтиҳонӣ аз 1-уми июл оғоз мегардад ва кормандони интихобшуда дар ин марказҳо фаъолият хоҳанд кард.
