Душанбе, 8-уми июни соли 2026
Имрӯз дар муассисаи таълимии таҳсилоти миёнаи умумии № 19-и ноҳияи Синои шаҳри Душанбе бо мақсади омода намудани кормандони муваққатие, ки дар марказҳои имтиҳонии шаҳри Душанбе ба сифати роҳбари маркази имтиҳонӣ, ёвари роҳбари маркази имтиҳонӣ, маъмури имтиҳон, ёвари маъмури имтиҳон ва бақайдгирандаи маркази имтиҳонӣ ба кор ҷалб карда мешаванд, семинарҳои омӯзишӣ баргузор гардид.
Дар семинар муовини директори Маркази миллии тестии назди Президенти Ҷумҳурии Тоҷикистон Олимҷонзода Уктам, сардори раёсати ташкил ва идораи имтиҳонҳои Марказ Саидзода Парвиз, номзадон ба вазифаҳои мазкур ва масъулини дигар иштирок доштанд.
Дар оғоз муовини директори Марказ Олимҷонзода Уктам дар бораи ҳадафи семинарҳои омӯзишӣ ва тартибу талаботи гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ дар соли 2026 суханронӣ намуда, таъкид кард, ки дар сатҳи баланд гузаронидани имтиҳонҳои марказонидаи дохилшавӣ, таъмини шафофияту адолат дар он ва пешгирӣ аз падидаҳои номатлубу амалҳои коррупсинонӣ аз мову шумо вобастагии зиёд дорад.
Бояд гуфт, ки семинарҳои омӯзишӣ барои кормандони муваққатии марказҳои имтиҳонӣ, ки то 13-уми июни соли 2026 идома меёбад, дар 22 шаҳру ноҳияи ҷумҳурӣ баргузор карда мешавад.
Тибқи эълони пешакӣ барои иштирок дар озмуни интихоби кормандони муваққатӣ ба ҳайси роҳбари маркази имтиҳонӣ, ёвари роҳбари маркази имтиҳонӣ, маъмури имтиҳон, ёвари маъмури имтиҳон ва бақайдгирандаи маркази имтиҳонӣ 4047 нафар хоҳишманд ҳуҷҷат пешниҳод намуданд. Баъд аз омӯзиш ва таҳлилҳи ҳуҷҷатҳо ба 3765 нафар хоҳишманд иҷозат дода шуд, то ки дар семинарҳои омӯзишии мазкур иштирок намоянд. Аз байни онҳо 2600 нафар ба ҳайси роҳбари маркази имтиҳонӣ, ёвари роҳбари маркази имтиҳонӣ, маъмури имтиҳон, ёвари маъмури имтиҳон ва бақайдгирандаи маркази имтиҳонӣ интихоб ва ба кори муваққатӣ дар Марказ ҷалб карда мешаванд.
Дар семинарҳои омӯзишӣ 35 нафар корманди дафтари асосии Марказ ва 68 нафар тренер хоҳишмандони кори муваққатиро барои баргузории имтиҳонҳо дар марказҳои имтиҳоние, ки дар шаҳру ноҳияҳои ҷумҳури ташкаил карда мешаванд, омода ва интихоб менамоянд.
