Душанбе, 7-уми феврали соли 2023
Аз 6-уми феврали соли 2023 Маркази миллии тестии назди Президенти Ҷумҳурии Тоҷикистон семинарҳои омӯзиширо барои кормандони муваққатии нуқтаҳои бақайдгирӣ оғоз намуд. Мақсад аз ин семинарҳо омода кардани кормандони муваққатӣ дар нуқтаҳои бақайдгирӣ аст, ки ҳамчун роҳбар, ёвари роҳбар, бақайдгирандагон дар ин нуқтаҳо кор хоҳанд кард.
Дар сатҳи зарурӣ ба роҳ мондани раванди бақайдгирии довталабон барои иштирок дар имтиҳонҳои марказонидаи дохилшавӣ (ИМД) ба муассисаҳои таълимии таҳсилоти миёна ва олии касбии Ҷумҳурии Тоҷикистон аз фаъолияти кормандони мазкур вобаста аст.
Мувофиқи нақша, барои ИМД-2023 дар 44 шаҳру ноҳияи ҷумҳурӣ 49 нуқтаи бақайдгирии доимамалкунанда бо теъдоди 152 истгоҳи корӣ ва дар 15 шаҳру ноҳияи дигар нуқтаҳои сайёри бақайдгирӣ таъсис дода мешавад.
Тибқи эълон, аз тариқи электронӣ 513 нафар хоҳишманд бо мақсади иштирок дар озмун барои интихоби кормандони муваққатии нуқтаҳои бақайдгирӣ ариза (бо ҳуҷҷатҳои дигари лозимӣ) пешниҳод намуданд. Аз ин шумора, мувофиқи таҳлилу баррасии ҳуҷҷатҳои пешниҳодкарда 420 нафар шахси аризадода ба семинарҳои омӯзишӣ ҷалб карда мешаванд.
Барои ташкилу баргузории семинарҳои омӯзишӣ дар шаҳру ноҳияҳои Душанбе, Хуҷанд, Бохтар, Кӯлоб, Хоруғ, Панҷакент ва Рашт аз ҷумлаи кормандони Марказ гурӯҳҳои корӣ таъсис дода шудааст. Тибқи барнома семинарҳои омӯзишӣ барои 15 гурӯҳ дар шаҳру ноҳияҳои зикршуда то 18-уми феврали соли 2023 давом меёбад.
Дар асоси озмун шахсони дорои донишу маҳорати арзанда барои фаъолият дар нуқтаҳои бақайдгирӣ интихоб карда мешаванд, ки шумораашон 220 нафарро ташкил медиҳад.
Марҳалаи асосии бақайдгирии довталабон аз 1-уми март то 30-юми апрели соли 2023 давом меёбад.
