Душанбе, 7-уми феврали соли 2024

5-уми феврали соли 2024 Маркази миллии тестии назди Президенти Ҷумҳурии Тоҷикистон семинарҳои омӯзиширо бо мақсади омӯзиш ва интихоби кормандони муваққатии нуқтаҳои бақайдгирӣ барои иштироки довталабон дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон (ИМД) дар соли ҷорӣ оғоз кард.

Кормандони муваққатие, ки баъд аз гузаштани семинарҳо дар асоси натиҷаҳои озмун ба кор қабул карда мешаванд, дар давраи якум (асосӣ)-и бақайдгирӣ ҳамчун роҳбар, ёвари роҳбар ва бақайдгирандагон дар ин нуқтаҳо кор хоҳанд кард.

Мувофиқи нақша бо мақсади шаффофу дастрас баргузор кардани бақайдгирии довталабон барои иштирок дар ИМД-2024 дар 59 шаҳру ноҳияи ҷумҳурӣ нуқтаҳои бақайдгирӣ, аз ҷумла дар 43 шаҳру ноҳия 47 нуқтаи доимии бақайдгирӣ бо 154 истгоҳи корӣ ва дар 16 шаҳру ноҳияи дигар нуқтаҳои сайёри бақайдгирӣ ташкил карда хоҳанд шуд. Нуқтаҳои мазкур барои фаъолият дар давраи якум (асосӣ)-и бақайдгирии довталабон барои иштирок дар ИМД‑2024, ки чун солҳои пеш аз 1-уми март оғоз мегардад, пешбинӣ гардидааст.

Тибқи эълон, аз тариқи электронӣ 529 нафар хоҳишманд бо мақсади иштирок дар озмуни интихоби кормандони муваққатии нуқтаҳои бақайдгирӣ ариза (бо ҳуҷҷатҳои дигари лозимӣ) пешниҳод намуданд. Аз ин шумораи аризадодагон, мувофиқи таҳлилу баррасии ҳуҷҷатҳои пешниҳодкарда 482 нафар ба семинарҳои омӯзишӣ ҷалб карда мешаванд.

Барои ташкилу баргузории семинарҳои омӯзишӣ дар шаҳру ноҳияҳои Душанбе, Хуҷанд, Бохтар, Кӯлоб, Хоруғ, Панҷакент ва Рашт аз ҷумлаи кормандони Марказ гурӯҳҳои корӣ таъсис дода шудааст. Тибқи барнома семинарҳои омӯзишӣ барои 15 гурӯҳ дар шаҳру ноҳияҳои зикршуда то 17-уми феврали соли 2024 давом меёбад.

Шумораи кормандоне, ки дар асоси озмун барои кор дар давраи якуми бақайдгирии довталабон (аз 1-уми март то 30-юми апрели соли 2024) дар нуқтаҳои бақайдгирӣ интихоб карда мешаванд, 241 нафарро ташкил медиҳад.