Душанбе, 14-уми апрели соли 2025
14-уми апрели соли 2025 дар байни хонандагони синфи 4-уми муассисаи таълимии таҳсилоти миёнаи умумии № 42-и ноҳияи Фирдавсии шаҳри Душанбе озмоиши маҳаллии Таҳқиқоти байналмилалии пешрафти саводи хондан – PIRLS 2026 (Progress in International Reading Literacy Study ) оғоз гардид.
Арзёбии байналмилалии PIRLS яке аз муҳимтарин таҳқиқоти ҷаҳонӣ оид ба сатҳи хониши хонандагони синфи 4-ум аст, ки дар он на танҳо малакаи хондан, балки қобилияти фаҳмидану дарки матн низ санҷида мешавад.
Тиқби фармоиши вазири маориф ва илми Ҷумҳурии Тоҷикистон озмоиши мазкур аз 14-уми апрел оғоз гардида, то 1-уми майи соли ҷорӣ идома меёбад. Озмоиши мазкур дар байни 42 муассисаи таълимии 25 шаҳру ноҳияи интихобшуда бо иштироки 1181 нафар хонандаи синфи 4-ум баргузор мегардад.
Ин озмоиш аз ду қисм иборат буда, дар он матнҳо, аз ҷумла ҳикоя, қисса, афсона ва матнҳои иттилоотию маърифатӣ истифода бурда мешаванд ва хонандагонро зарур аст, ки аз рӯйи матнҳои пешниҳодшуда қобилияташонро дар фаҳмидану дарки матн нишон диҳанд.
Бо мақсади дар сатҳи хуб ташкилу баргузор намудани озмоиши мазкур аз ҷумлаи кормандони соҳаи маориф баъд аз иштирок дар семинарҳои омӯзишӣ 158 нафар мутасаддӣ масъул карда шудаанд.
Мавриди зикр аст, ки таҳқиқоти мазкур дар байни хонандагони синфи 4-уми зиёда аз 60 кишвари дунё бо истифода аз таҷҳизоти компютерӣ ба таври бархат (онлайн) ё брунхат (офлайн) баргузор мегардад. Дар Ҷумҳурии Тоҷикистон, ки бори аввал ин таҳқиқот доир мегардад, ба таври офлайн ба нақша гирифта шудааст.
Ҳамзамон, дар баробари баргузории озмоиши маҳаллии PIRLS, дар байни маъмурияти муассисаҳои таълимӣ, омӯзгорон, хонандагон ва падару модарон бо мақсади муайян кардани омилҳои ба раванди таълиму тарбияи хонандагон таъсиррасон пурсиш доир карда мешавад.
