Душанбе, 25-уми январи соли 2019
Дар амал татбиқ намудани низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар рушди маорифи мамлакат, баланд бардоштани касбияти донишҷӯёну мутахассисон ва арзёбии дониши воқеии дастпарварони муассисаҳои таълимӣ нақши муҳим дорад. Лозим ба таъкид аст, ки дуруст ба роҳ мондани корҳои омодагӣ ба имтиҳонҳои марказонидани дохилшавӣ, хусусан корҳои иттилоотию таблиғотӣ як омили комёбии довталабон дар имтиҳонҳои мазкур ба ҳисоб меравад.
Дар робита ба ин Маркази миллии тестии назди Президенти Ҷумҳурии Тоҷикистон рӯзи 17-уми январ дар шаҳри Хуҷанди вилояти Суғд курси шиносоӣ бо низоми имтиҳонҳои марказонидаи дохилшавиро барои таблиғгарони минтақаи мазкур оғоз намуд. Дар кори семинар 29 нафар корманди шуъбаву раёсатҳои маорифи шаҳру ноҳияҳо ба ҳайси таблиғгар иштирок намуданд. Дар ифтитоҳи кори семинар муовини сардори раёсати маорифи вилоят Раҳматов С. А. иштирок ва суханронӣ намуд. Мавсуф, аз ҷумла қайд намуд, ки имтиҳонҳои марказонидаи дохилшавӣ чорабинии муҳими соҳаи маорифи кишвар мебошад, ки таваҷҷуҳи тамоми қишрҳои ҷомеа дар тамоми марҳалаҳояш ба он нигаронида мешавад. Президенти кишвар, Пешвои миллат, муҳтарам Эмомалӣ Раҳмон дар баромадҳояшон пайваста таъкид менамоянд, ки низоми имтиҳонҳои марказонидаи дохилшавӣ таъминкунандаи шаффофият, адолат ва арзёбии баробари донишу маҳорати довталабон мебошад. Инчунин, сардори бахши минтақавии Маркази миллии тестии назди Президенти Ҷумҳурии Тоҷикистон дар шаҳри Хуҷанд Аҳмадзода М. баромад карда, оид ба ҳадаф ва вазифаҳои курси омӯзишӣ, тартиби гузаронидани дарсҳо (дар маҷмӯъ, 9 дарс дар давоми 3 рӯз) дар доираи мавзӯъҳои мухталиф иштирокдорони курсро шинос намуд.
Сипас кормандони Маркази миллии тестии назди Президенти Ҷумҳурии Тоҷикистон – сардори шуъбаи ташкил ва идораи имтиҳон Саидов П. Ҳ., сардори шуъбаи технологияҳои иттилоотию коммуникатсионӣ Назаров Р. С. дар доираи мавзӯъҳои пешниҳодшудаи курси шиносоӣ суханронӣ карданд. Бояд таъкид кард, ки доир ба навгониҳои воридгардида дар низоми ИМД барои соли 2019 низ иттилоъ дода шуд.
Ҳамчунин, маводи ёрирасони иттилоотӣ ва омӯзишӣ, аз ҷумла намунаи китобчаҳои тестӣ, дастури иттилоотию методии “Роҳнамои довталаб” ба ҳар яке аз таблиғгарони шаҳру ноҳияҳо пешниҳод карда шуд.
