Душанбе, 20-уми январи соли 2025
20-уми январи соли 2025 дар муассисаи таълимии таҳсилоти миёнаи умумии назди Сарраёсати маорифи шаҳри Душанбе курси шиносоӣ бо иштироки намояндагони сарраёсат, раёсат, шуъба ва бахшҳои маорифи ноҳияҳои шаҳри Душанбе, Вилояти Мухтори Кӯҳистони Бадахшон, шаҳру ноҳияҳои тобеи марказ ва вилояти Суғд баргузор гардид.
Тазаккур бояд дод, ки курси мазкурро Маркази миллии тестии назди Президенти Ҷумҳурии Тоҷикистон дар ҳамкорӣ бо вазорати маориф ва илми Ҷумҳурии Тоҷикистон бо мақсади омӯзонидани таблиғгарони низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон (ИМД) дар соли 2025 ва шаҳрвандон, бахусус хатмкунандагони муассисаҳои таълимии таҳсилоти миёнаи умумӣ ва ибтидоию миёнаи касбӣ ва омӯзгорон бо низоми ИМД дар се сатҳ: ҷумҳуриявӣ, шаҳрию ноҳиявӣ ва муассисаҳои таълимӣ ташкилу баргузор кард.
Дар рафти баргузории курсҳои шиносоӣ бо низоми ИМД барои соли 2025 ба намояндагони сарраёсат, раёсат, шуъба ва бахшҳои маорифи ноҳияҳои шаҳри Душанбе, Вилояти Мухтори Кӯҳистони Бадахшон, шаҳру ноҳияҳои тобеи марказ ва вилояти Суғд доир ба дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки 28 декабри соли 2024 зимни ироаи паёми навбатӣ ба Маҷлиси Олӣ «Дар бораи самтҳои асосии сиёсати дохилӣ ва хориҷии кишвар» баён доштанд, ба таври муфассал сухан гуфта, муҳтавои нуктаҳои асосии паёми сарвари давлатро шарҳу тавзеҳ доданд.
Дар ин семинар доир ба талаботу қоидаҳои муқарраршуда барои бақайдгирии довталабон ва мавзуъҳои дигари дахлдор гуфтугӯҳо сурат гирифт. Ҳайати кории Марказ дар доираи барнома ва модули омӯзишӣ барои шарҳу тафсили мавзуъҳои дарсӣ шаклҳои гуногуни таълими интерактивӣ, аз ҷумла муаррифии компютерӣ, маърӯзаҳои хурд, маводди чопию электронӣ ва ғайраро омода намудаанд.
Замони баргузории курси шиносоӣ бо низоми ИМД дар сатҳи аввал нафар кормандони муваққатии Марказ – таблиғгарон дар соли 2025 вобаста ба минтақаҳои дигар чунин муқаррар шудааст:
◘ барои таблиғгарони шаҳру ноҳияҳои водии Вахши вилояти Хатлон аз 23-юм то 24-уми январи соли 2025 дар шаҳри Бохтар;
◘ барои таблиғгарони шаҳру ноҳияҳои минтақаи Кӯлоби вилояти Хатлон аз 23-юм то 24-уми январи соли 2025 дар шаҳри Кӯлоб;
◘ барои таблиғгарони шаҳру ноҳияҳои вилояти Суғд (ба истиснои водии Зарафшон) аз 23-юм то 24-уми январи соли 2025 дар шаҳри Хуҷанд.
Сатҳи дуюми курси шиносоӣ барои 3816 нафар намояндаи муассисаҳои таълимии таҳсилоти умумии асосӣ, миёнаи умумӣ ва ибтидоию миёнаи касбӣ дар раёсат, шуъба ва бахшҳои маорифи 68 шаҳру ноҳияи ҷумҳурӣ аз 29-ум то 30-юми январи соли 2025 ва сатҳи сеюми курси шиносоӣ барои хатмкунандгони синфҳои 9-ум ва 11-уми муассисаҳои таълимии зикршуда давоми моҳи феврал бевосита дар худи муассисаҳои таълимӣ ба роҳ монда мешавад.
Дар анҷоми курс барои фаъолияти пурсамару арзанда 5 нафар корманди муваққатии Марказ (таблиғгарон) бо сипосномаи Маркази миллии тестии назди Президенти Ҷумҳурии Тоҷикистон қадр карда шуданд.
