Маркази миллии тестии назди Президенти Ҷумҳурии Тоҷикистон аз 22-юми октябри соли 2022 дар ҳамкорӣ бо Вазорати маориф ва илми Ҷумҳурии Тоҷикистон бо мақсади муайян намудани сатҳи дониши хатмкунандагон аз фанҳои имтиҳонӣ, шиносоии онҳо бо тарҳи маҷмуи фанҳои имтиҳонӣ ва таркиби саволу масъалаҳои тест, баланд бардоштани масъулияти хатмкунандагон барои супоридани имтиҳонҳо аз рӯйи тарҳи нави маҷмуи фанҳои имтиҳонии низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ имтиҳонҳои озмоиширо баргузор менамояд.

Аввалин имтиҳонҳои озмоишӣ барои имсол дар шаҳри Панҷакент шуруъ гардид. Лозим ба зикр аст, ки дар имтиҳонҳои озмоишӣ дар муассисаҳои таҳсилоти миёнаи умумии №12, 16, 48, 31, 97-и шаҳри Панҷакент бо фарогирии 240 нафар хамткунанда гузаронида шуд. Инчунин, вобаста ба имтиҳонҳои озмоишӣ дар муассисаҳои таҳсилоти миёнаи умумии №12 ва №16-и шаҳри Панҷакент вохӯрӣ бо омӯзгорон ва волидайни хатмкунандагон доир гардид. Дар ин замина ба шуъбаҳои маорифи шаҳру ноҳияҳои кишвар шакли электронии китобчаҳои тестии имтиҳонҳои озмоишӣ ирсол шуд.

Ёдовар мешавем, ки Марказ тасмим гирифтааст, имтиҳонҳои озмоиширо аз 22-юми октябр то 20-уми декабри соли 2022 дар зиёда аз 300 муассисаи таҳсилоти миёнаи умумии ҷумҳурӣ бо хатмкунандагон баргузор намояд.
Дар сомонаи расмии Маркази миллии тестии назди Президенти Ҷумҳурии Тоҷикистон низ шакли электронии тарҳи нави маҷмуи китобчаҳои тестии имтиҳонҳои озмоишӣ гузошта шуд, то ки хатмкунандагон бо он мустақилона шиносоӣ пайдо кунанд.

Имтиҳонҳои озмоишӣ дар дигар шаҳру ноҳияҳои ҷумҳурӣ низ тибқи нақша ба роҳ монда мешаванд.