Душанбе, 1 июли соли 2014
Имрӯз дар 33 маркази имтиҳонӣ барои довталабони гурӯҳи ихтисосҳо (кластер)-и 1 имтиҳони қисм (компонент)-и А оғоз шуд. Дар ин имтиҳон иштироки 9 526 довталаби сабтиномшуда дар назар аст. Теъдоди воқеии иштирокдорон пас аз баргузории имтиҳон муайян хоҳад шуд. Дар соли 2014 теъдоди умумии иштирокдорони сабтиномшудаи ИМД 52 406 довталаб мебошад.
Бояд гуфт, ки имтиҳонҳои марказонидаи дохилшавӣ дар 11 шаҳру ноҳияи ҷумҳурӣ дар 39 маркази имтиҳоние, ки аз тарафи Вазорати маориф ва илми Ҷумҳурии Тоҷикистон тасдиқ шудаанд, баргузор мегарданд. Рӯйхати нишонии марказҳои имтиҳонӣ дар сомонаи расмии Маркази милии тестии назди Президенти Ҷумҳурии Тоҷикистон гузошта шудааст.
Ёдовар мешавем, ки тибқи низоми муқарраргардидаи имтиҳонҳои марказонидаи дохилшавӣ имтиҳонҳои тестӣ дар ду давр – имтиҳони умумӣ (қисми А) ва имтиҳони ихтисос (қисми Б) гузаронида мешавад.
Довтаталабон имрӯз аз имтиҳони умумӣ, ки фанҳои забони тоҷикӣ, математика, таърихи халқи тоҷик ва асосҳои давлат ва ҳуқуқро дар бар мегирад, имтиҳон месупоранд.
Имтиҳони тестии қисми А барои кластерҳои 2-5 аз 2 то 5 июл ва имтиҳони тестии компоненти Б барои тамоми кластерҳо аз 7 то 11 июл баргузор мегардад.
Натиҷаҳои имтиҳонҳои тестӣ тавассути низоми баллҳо арзёбӣ мешавад. Барои субтестҳои фанҳои имтиҳонии қисми А натиҷаи имконпазири ҳадди аксар 200 балл ва барои субтестҳои фанҳои имтиҳонии қисми Б натиҷаи имконпазири ҳадди аксар 300 балл аст. Натиҷаи имконпазири умумии ҳадди аксар барои субтестҳои қисмҳои А ва Б 500 балл мебошад.
Инчунин, он довталабоне, ки ба ихстисосҳои самти санъат, дизайн, меъморӣ, динӣ (исломӣ) ва варзиш ҳуҷҷат супоридаанд, дар баробари имтиҳонҳои тестии қисмҳои А ва Б имтиҳони эҷодӣ ва маҳорат (ИЭМ) низ месупоранд.
Ҳамин тариқ, вобаста ба натиҷаҳои имтиҳонҳои эҷодию маҳорат ва имтиёзҳои муқарраргардида балли имконпазири умумии ҳадди аксар метавонад зиёд шавад.
Имтиҳонҳои эҷодӣ ва маҳорат пас аз гузаштани имтиҳонҳои тестии қисмҳои А ва Б вобаста ба гурӯҳи ихтисос (кластер)-ҳо дар муассисаҳои таълимии таҳсилоти олии касбии дахлдор аз 10 то 19 июл гузаронида мешавад.
Эълони натиҷаҳои имтиҳонҳо тибқи нақша 1 август пешбинӣ гардидааст.
