Душанбе, 28-уми марти соли 2023

Маркази миллии тестии назди Президенти Ҷумҳурии Тоҷикистон марҳалаи асосии бақайдгирии довталабонро барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ дар соли 2023 аз 1‑уми март ба роҳ монда буд. Дар шаҳру ноҳияҳое, ки нуқтаҳои доимии бақайдгирӣ амал намекунанд, нуқтаҳои бақайдгирии сайёр таъсис дода шудааст.

Ин нуқтаҳо 27-уми марти соли 2023, аз ҷумла дар 6 ноҳияи ҷумҳурӣ – Дарвоз, Кӯҳистони Мастчоҳ, Сангвор, Ховалинг, Балҷувон ва Ишкошим ба кор шуруъ хоҳад кард. Муҳлати фаъолияти нуқтаҳои мазкур дар давоми то ду ҳафта ба нақша гирифта шудааст, ки зиёда аз 2000 нафар хатмкунандаи ноҳияҳои зикршуда тавассути онҳо метавонанд аз қайди расмии Маркази миллии тестии назди Президенти Ҷумҳурии Тоҷикистон гузаранд.

Давоми моҳи марти соли 2023 дар 6 шаҳру ноҳияи дигари ҷумҳурӣ низ, аз ҷумла шаҳри Роғун, ноҳияҳои Тоҷикобод, Нуробод, Шаҳристон, Роштқалъа, Рӯшон нуқтаҳои бақайдгирии сайёр фаъолият карда буданд, ки зиёда аз 3000 нафар хатмкунанда дар заминаи синфҳои 9-ум ва 11-ум дар онҳо ба қайд гирифта шуданд.

Инчунин, тибқи нақшаи фаъолияти Марказ дар давоми моҳи апрели соли 2023 боз дар 3 ноҳияи дигари ҷумҳурӣ: Лахш, Ванҷ, Мурғоб нуқтаҳои бақайдгирии сайёр таъсис дода мешавад.

Ёдовар мешавем, ки мувофиқи нақша дар имтиҳонҳои марказонидаи дохилшавӣ-2023 дар 44 шаҳру ноҳияи ҷумҳурӣ 49 нуқтаи бақайдгирии доимоамалкунанда бо теъдоди 152 истгоҳи корӣ ва дар 15 шаҳру ноҳияи дигар нуқтаҳои сайёри бақайдгирӣ таъсис дода шудааст, ки дар умум, 59 шаҳру ноҳияро фаро мегирад. Рӯйхати нуқтаҳои бақайдгирӣ дар сомонаи Марказ ҷой дода шудааст (https://ntc.tj/images/Downloads/ruykhati_nb_2023.pdf).