Душанбе, 27-уми январи соли 2023
Маркази миллии тестии назди Президенти Ҷумҳурии Тоҷикистон дар ҳамкорӣ бо Вазорати маориф ва илми Ҷумҳурии Тоҷикистон даври дуюми курси шиносоиро барои омӯзгорони муассисаҳои таълимӣ рӯзи 26.01.2023 оғоз кард. Он 26-27-уми январи соли 2023 дар 68 шаҳру ноҳияи ҷумҳурӣ аз ҷониби 137 нафар таблиғгар — тренерон сурат мегирад. Марҳилаи сеюми курси шиносоиро дар 3754 муассисаи таълимӣ, ки дар онҳо хатмкунандагони синфҳои 9-ум ва 11-ум таҳсил доранд, омӯзгороне, ки ҳамчун тарғибгар омӯзиш кардаанд, баргузор менамоянд.
Тибқи нақша, дар даври дувуми курси мазкур зиёда аз 4000 нафар директорон, ҷонишинҳои директорон, омӯзгорон, намояндагони мақомоти иҷроияи ҳокимияти давлатӣ ва раёсату шуъбаҳои маориф иштирок менамоянд. Шунавандагон дар курси шиносоӣ тибқи барнома ва модули омӯзишӣ бо низоми ИМД ва хусусиятҳои он ошно хоҳанд шуд.
Даври сеюми курси шиносоӣ тибқи фармоиши вазири маориф ва илми Ҷумҳурии Тоҷикистон аз 1-уми феврали соли 2023 оғоз ёфта, барои зиёда аз 150000 нафар хатмкунандаи муассисаҳои таълимии таҳсилоти умумии асосӣ, миёнаи умумӣ, ибтидоӣ ва миёнаи касбӣ (дар заминаи синфи 9-ум ва 11-ум) ба роҳ монда мешавад.
Дар ин даври курс, ки аз 1-уми феврал то 10-уми март давом меёбад, вохӯриҳои кормандони муваққатии Марказ бо хатмкунандагони муассисаҳои таълимии шаҳру ноҳияҳо, омӯзгорон ва падару модарон пешбинӣ шудааст.
