Бо ташаббуси Вазорати маорифи Ҷумҳурии Тоҷикистон 12 сентябри соли ҷорӣ дар толори маҷлисгоҳи вазорат бо иштироки муовинони вазири маориф, сардорон ва мутахассисони раёсатҳои кадрҳо ва корҳои махсус, таҳсилоти томактабӣ ва миёнаи умумӣ, таҳсилоти ибтидоӣ ва миёнаи касбӣ, таҳсилоти олии касбӣ ва баъдидипломӣ ва дигар шуъбаҳою бахшҳо муаррифии низоми нави “Имтиҳонҳои марказонидашудаи дохилшавӣ (ИМД) ба муассисаҳои таҳсилоти олии касбӣ (МТОК)-и Ҷумҳурии Тоҷикистон” доир гардид.
Сараввал, директори Муассисаи давлатии “Маркази миллии тестӣ” (ММТ) С.Ҷаъфаров, ки низоми нави ИМД аз тарафи маркази мазкур дар ҳамкорӣ бо мутахассисони вазорати маориф, намояндагони ташкилотҳои хориҷӣ ва мушовирони байналмилалӣ таҳия гардидааст, ба таври мушаххас оид ба паҳлӯҳо ва хусусиятҳои хоси он маърӯза намуд. Ӯ аз ҷумла қайд намуд, ки “Имтиҳонҳои марказонидашудаи дохилшавӣ низоми муҷаҳҳаз ба технологияи муосир буда, бо мақсади арзёбии дониш ва интихоби одилона, шаффоф ва дастрасии баробари довталабон ба муассисаҳои таҳсилоти олии касбии ҷумҳурӣ таҳия гардидааст. Дар раванди таҳияи низоми мазкур тамоми расму ойнҳо ва хусусиятҳои мардуми Тоҷикистон ба инобат гирифта шудааст”.
Бояд қайд намуд, ки низоми нав ба тариқи мутамарказ қабули довталабонро ба МТОК-и Ҷумҳурии Тоҷикистон ба роҳ мемонад. Довталабон аз нуқтаҳои бақайдгирӣ ва марказҳои имтиҳонӣ, ки аз тарафи ММТ дар минтақаҳои гуногуни ҷумҳурӣ таъсис дода мешавад, истифода бурда, барои дохил шудан ба МТОК дар нуқтаҳои бақайдгирӣ аз қайд гузашта, дар марказҳои имтиҳонӣ имтиҳон месупоранд. Ба ҳар як довталабе, ки аз қайд мегузарад, вобаста ба ҷойи макони зист даъватнома барои иштирок дар супоридани имтиҳонҳо фиристода мешавад.
Низоми нави ИМД аз 14 марҳиллаи асосӣ иборат буда, аз моҳи ноябр оғоз ёфта то моҳи августи соли оянда давом меёбад.
Яке аз хусусиятҳои хоси низоми нави ИМД дар он аст, ки довталаб имкони дар доираи гурӯҳбандии ихтисосҳои монанд (кластер) то 10 ихтисосро вобаста ба афзалият, шакли таҳсил, намуд ва муассисаи таълимӣ интихоб намояд.
Хусусияти дигари низоми нав дар он аст, ки ба довталаби дорои ҳуҷҷатҳои тасдиқкунандаи иловагӣ (ғолибияти олимпиадаҳои фаннӣ ва мусобиқаҳои варзишии ҷумҳуриявӣ ва байналмилалӣ, дараҷаи маъюбӣ аз КНТ, дорандаи медалли тилло ва нуқра, ятимони кул, фарзандони иштирокчиёни фоҷиаи Чернобил ва ғайра) имтиёзҳо пешбинӣ шудааст.
Сипас, баъд аз маърӯзаи С.Ҷаъфаров байни иштирокчиён ва кормандони ММТ баҳсу муҳокимаҳо ва саволу ҷавобҳо доир гардид.
Дар фарҷоми чорабинии мазкур, муовини аввали Вазири маориф Ф.Раҳимов гузаронидани чунин чорабиниро қобили қабул дониста пешниҳод намуд, ки “Чунин муаррифӣ дар оянда на танҳо барои кормандон ва мутахассисони дастгоҳи вазорат, балки барои муассиса ва ташкилотҳои тобеи вазорат ва вазорату кумитаҳои давлатӣ, ки дар тобеяти онҳо муассисаҳои олӣ фаъолият менамоянд, ташкил ва гузаронида шавад ва бо ҳамин роҳ мо имконият пайдо менамоем, ки дар ҷомеа низоми нави ИМД ба МТОК-ро муаррифӣ намоем”.
