27 ноябри соли ҷорӣ дар маҷлисгоҳи бинои “Душанбе-Плаза”-и шаҳри Душанбе муаррифии “Низоми имтиҳонҳои марказонидаи дохилшавӣ ба муассисаҳои таҳсилоти олии касбии Ҷумҳурии Тоҷикистон” доир гардид. Муаррифӣ аз тарафи Маркази миллии тестӣ гузаронида шуда, дар он мудири шуъбаи илм ва маорифи Дастгоҳи иҷроияи Президенти Ҷумҳурии Тоҷикистон Нозимов А., роҳбари Барномаи ҳамкории рушди таҳсилоти Россия (READ) дар Тоҷикистон Бозорова С., роҳбари Шуъбаи Институти «Ҷамъияти Кушода» - Бунёди мадад Ҳалимова З., Сафири фавқулода ва мухтори Федератсияи Россия дар Ҷумҳурии Тоҷикистон Лякин-Фролов И., муовинони Вазири маориф ва илми Ҷумҳурии Тоҷикистон Исмонов Ф. ва Маҳмадова Т., роҳбарони мактабҳои олӣ, мақомоти маҳаллии ҳокимияти давлатӣ, кормандони сохторҳои соҳаи маориф, мушовирони байналмилалӣ ва намояндагони воситаҳои ахбори омма иштирок намуданд.
Муаррифиро муовини вазири маориф ва илм Исмонов Ф. ифтитоҳ намуда, оид ба мақсад ва вазифаҳои чорабинии мазкур ба ҳозирин иттилоъ дод. Бо сухани ифтитоҳӣ Нозимов А., Лякин-Фролов И., Ҳалимова З. ва Бозорова С. баромад намуданд.
Вобаста ба тартибу қоида ва расмиёти низоми ИМД директори Маркази миллии тестӣ Ҷаъфаров С. баромад намуда, тариқи слайдҳо оид ба моҳияти низом, таъсири он ба рушди соҳаи маориф ва ҳаёти иқтисодию иҷтимоии ҷумҳурӣ гуфта гузаштанд.
Дар баромади муовини аввали директори Маркази миллии тестӣ Менглиев Б. оид ба ташкил ва идораи имтиҳонҳои марказонидашуда маълумот дода шуд. Аз баромад маълум гардид, ки низоми нави ИМД аз низоми амалкунанда бо хусусиятҳои хоси худ фарқ мекунад. Яке аз хусусиятҳои хоси низоми ИМД интихоби васеи ихтисосҳо аз ҷониби довталабон мебошад. Ҳар як довталаб ҳуқуқ дорад, ки вобаста ба гурӯҳи ихтисосҳо то 10 ихтисос ва донишгоҳу донишкадаҳоро интихоб намояд. Хусусияти дигари низом дар он аст, ки довталаб дар макони зисти худ аз қайд гузашта, имтиҳонҳои дохилшавиро дар он ҷо месупорад.
Дар ҷараёни муаррифӣ сардорони шуъбаҳои Маркази миллии тестӣ Азимов Ҷ., Шодиев М., Назаров Р. ва Асоев Р. баромад намуда, оид ба давра ба давра амалӣ намудани низом, таҳияи саволу супоришҳои тестӣ, раванди супоридани имтиҳонҳои эҷодӣ ва маҳорат, автоматикунонии раванди бақайдгирӣ ва тақсимоти донишҷӯён ба донишгоҳу донишкадаҳо ва таъмини бехатарӣ дар марҳалаҳои низом маълумот доданд.
Баъд аз баромадҳо байни иштирокчиён ва кормандони Маркази миллии тестӣ саволу ҷавоб ва баҳсу муҳокимаҳо доир гардид.
Аз ҷараёни муаррифӣ хулоса баровардан мумкин аст, ки ҷорӣ намудани низоми ИМД ба муассисаҳои таҳсилоти олии касбии Ҷумҳурии Тоҷикистон, ки дар заминаи иҷрои қарору супоришҳои Ҳукумати Ҷумҳурии Тоҷикистон роҳандозӣ шуда истодааст, таъсири мусбӣ ба тамоми қиширҳои ҷомеа расонида шуда, ба пешрафти соҳаи маориф замима мегузорад.
