20 сентябри соли 2013  дар ноҳияи Ёвони вилояти Хатлон барои мудирони кабинетҳои методии шуъбаҳои маорифи 25 шаҳру ноҳияҳои вилояти Хатлон семинар-машварат доир гардид. Бо даъвати Раёсати маорифи вилоят ҷиҳати муаррифии низоми имтиҳонҳои марказонидашудаи дохилшавӣ (ИМД) ба муассисаҳои таҳсилоти олии касбии Ҷумҳурии Тоҷикистон мутахассисони Муассисаи давлатии “Маркази миллии тестӣ” (ММТ) дар семинар-машварат иштирок намуда, низоми ИМД-ро муаррифӣ намуданд. Муаррифӣ дар шакли электронӣ намоиш дода шуда, ба иштирокчиён оид ба таъсис ва мақсаду вазифаҳои ММТ, хусусиятҳои фарқкунандаи низоми ИМД аз низоми амалкунандаи қабули довталабон, марҳилаҳои асосии ҷорӣ намудани низоми ИМД, бақайдгирии довталабон, супоридани имтиҳонҳо ва тарзи навишти кори хаттии эссе маълумот дода шуд. Ба иштирокчиён маводи иттилоотӣ, аз қабили буклети ММТ ва брошюраи низоми ИМД тақсим карда шуд.

Ба саволҳои иштирокчиёни машварат оид ба дастрас намудани намунаҳои саволномаҳои тестӣ, тарзи таҳия, навишт ва санҷиши кори хаттии эссе, имтиҳонҳои эҷодӣ ва маҳорат, имтиёзҳо ва ҳуҷҷатҳои лозимӣ барои бақайдгирӣ аз тарафи мутахассисони ММТ посухҳои муфассал дода шуд.

Аз ҷониби иштирокчиён пешниҳодҳо ҷиҳати амалӣ намудани низоми ИМД, ташкили корҳои фаҳмондадиҳӣ дар байни хонандагон ва дигар паҳлӯҳои низом мавриди муҳокима қарор гирифт. 

Дар фарҷоми муаррифӣ ҷиҳати амалӣ намудани нақшаи чорабиниҳо оид ба ташкил ва гузаронидани вохӯриҳо бо директорон, омӯзгорон ва хатмкунандагони муассисаҳои таҳсилоти миёнаи умумӣ ва падару модарон ҷавдали махсус бо ҳар як мудири кабинети методии шаҳру ноҳияҳои вилоят таҳия гардид. Мувофиқи нақша вохӯриҳо аз октябри соли ҷорӣ то марти соли 2014 гузаронида мешаванд.