Душанбе, 1-уми феврали соли 2019
Маркази миллии тестии назди Президенти Ҷумҳурии Тоҷикистон ҷиҳати иҷрои Амри Президенти Ҷумҳурии Тоҷикистон аз 15-уми сентябри соли 2011, № АП-1729 ва Нақшаи ташкил ва гузаронидани нишастҳои матбуотӣ дар вазорату идораҳо, ташкилоту муассисаҳо, мактабҳои олӣ, ВМКБ, вилоятҳо, шаҳри Душанбе ва шаҳру ноҳияҳои тобеи ҷумҳурӣ оид ба ҷамъбасти соли 2018, ки аз ҷониби Роҳбари Дастгоҳи иҷроияи Президенти Ҷумҳурии Тоҷикистон (11.12.2018, № 26/10-179) тасдиқ шудааст, рӯзи 31-уми январи соли 2019 дар ҳузури намояндагони воситаҳои ахбори омма дар Маркази матбуотии ҷумҳуриявӣ АМИТ “Ховар” нишасти матбуотӣ баргузор кард.
Дар ин нишасти хабарӣ намояндагони 30 расонаи иттилоотии давлативу мустақили кишвар, аз қабили рӯзномаву ҳафтаномаҳо, шабакаҳои телевизионӣ ширкат варзиданд. Қаблан барои намояндагони воситаҳои ахбори омма эъломияи иттилоотӣ (пресс-релиз) дар шакли китобча (20 саҳифа) оид ба фаъолияти Маркази миллии тестии назди Президенти Ҷумҳурии Тоҷикистон дар соли 2018 бо забони тоҷикӣ пешниҳод карда шуд. Дар он оид ба муҳимтарин ҷабҳаҳои кори муассисаи номбурда дар соли гузашта мухтасар маълумот дода шудааст.
Дар нишасти матбуотӣ директори Маркази миллии тестии назди Президенти Ҷумҳурии Тоҷикистон Икромӣ Хуршед, муовини якуми директор Ҷаъфаров С. Ф., ёвари директор Юлдошев А. Ш., сардорони шуъбаҳо ва дигар шахсони масъули муассиса ҳузур доштанд.
Директори Марказ аз ҳамкории рӯзноманигорон бо Марказ ва иштироки онҳо дар корҳои таблиғотию иттилоърасонӣ вобаста ба низоми имтиҳонҳои марказонидаи дохилшавӣ ба муассисаҳои таълимии таҳсилоти миёнаву олии касбӣ ва умуман, фаъолияти Марказ, масъалабардории онҳо аз тариқи ВАО изҳори қаноатмандӣ намуда, таъкид кард, ки азбаски оид ба фаъолияти муассиса маълумотнома бо забони давлатӣ омода ва ба ҳозирин пешниҳод гардидааст, зарурати додани маълумоти умумӣ нест ва барои сарфаи вақт дарҳол ба посухи суолҳои хабарнигорон гузаштан ҳадафманд хоҳад буд.
Хабарнигорон ба саволҳои худ дар бораи умдатарин масъалаҳои марбут ба имтиҳонҳои марказонидаи дохилшавӣ ба коллеҷу донишгоҳу донишкадаҳо дар Ҷумҳурии Тоҷикистон, навгониҳои имсола дар низоми ин имтиҳонҳо, аз байн рафтани падидаҳои номатлуби қаллобию фасод ҳангоми дохилшавӣ ба муассисаҳои таълимӣ ва ғайра посух гирифтанд.
Маълумотнома оид ба фаъолияти Маркази миллии тестии назди Президенти Ҷумҳурии Тоҷикистон, ки дастраси намояндагони ВАО гардонида шуда буд, дар сомонаи расмии Марказ низ гузошта шуд.
