4-уми августи соли 2022
4-уми августи соли ҷорӣ дар маҷлисгоҳи Маркази миллии тестии назди Президенти Ҷумҳурии Тоҷикистон (Минбаъд: Марказ) нишасти матбуотӣ доир гардид. Мавзуи он асосан фаъолияти Марказ дар нимсолаи якуми соли 2022 буд.
Ба кори ҳамоиш, ки дар он намояндагони расонаҳои хабарии кишвар − рӯзномаву ҳафтанома, маҷалла, радиову телевизион ва ожонсиҳои иттилоотӣ ширкат доштанд, директори Марказ Ҷаъфарзода Сабзалӣ оғоз бахшида, навбати суханро ба рӯзноманигорону хабарнигорон дод.
Дар рафти суолу посухҳо аз ҷумла, тазаккур дода шуд, ки шумораи умумии муассисаҳои таълимии таҳсилоти миёна ва олии касбие, ки соли 2022 қабули донишҷӯён ба онҳо ба воситаи низоми ИМД ба роҳ монда шуд, ба 109-то расид. Ин шумора 39 муассисаи таълимии таҳсилоти олии касбӣ ва 70 муассисаи таълимии таҳсилоти миёнаи касбиро дар бар мегирад, ки нисбат ба соли 2021 6-то бештар аст (3-то муассисаи таълимии таҳсилоти олии касбӣ ва 3-то муассисаи таълимии таҳсилоти миёнаи касбӣ).
Қайд шуд, ки, барои қабули донишҷӯён ба коллеҷҳо ва донишгоҳу донишкадаҳо дар заминаи таҳсилоти миёнаи умумӣ, ибтидоӣ, миёнаи касбӣ ва умумии асосӣ тибқи нақша дар соли 2022-юм 105997 ҷой ҷудо гардида буд, ки аз он 20042 ҷой (18,91 %) барои таҳсили ройгон ва 85955-тоаш (81,09 %) барои таҳсили пулакӣ пешбинӣ шудааст.
Зимни нишаст роҳбарияти Марказ ба ҳамаи суолҳои намояндагони расонаҳои хабарӣ посухҳои дақиқ гуфт ва дар охир директори Марказ ба аҳли матбуот барои иштироки фаъолона дар нишаст изҳори миннатдорӣ намуда, аз онҳо умеди ҳамкориҳои судманд дар оянда кард.
