Душанбе, 25-уми январи соли 2018
Маркази миллии тестии назди Президенти Ҷумҳурии Тоҷикистон мувофиқи Нақшаи ташкил ва гузаронидани нишастҳои матбуотӣ дар вазорату идораҳо, ташкилоту муассисаҳо, мактабҳои олӣ, ВМКБ, вилоятҳо, шаҳри Душанбе ва шаҳру ноҳияҳои тобеи ҷумҳурӣ оид ба фаъолияти худ, мутобиқи Амри Президенти Ҷумҳурии Тоҷикистон аз 15-уми сентябри соли 2011, №АП-1729 дар ҳузури намояндагони воситаҳои ахбори омма дар Маркази матбуотии ҷумҳуриявӣ АМИТ “Ховар” нишасти матбуотӣ доир намуд.
Дар нишасти хабарӣ намояндагони 30 расонаи иттилоотии дохиливу хориҷи кишвар, давлативу мустақил, аз қабили рӯзномаҳои “Ҷумҳурият”, ҳафтаномаи “Тоҷикистон”, ”Халқ овози”, “Азия плюс”, МИА “Россия сегодня”, “Омӯзгор”, расонаи иттилоотии “Ховар”, шабакаҳои телевизионии “Баҳористон”, “Пойтахт” ва ғайраҳо иштирок намуданд. Барои намояндагони воситаҳои ахбори омма варақаҳои иттилоотӣ оид ба фаъолияти Маркази миллии тестии назди Президенти Ҷумҳурии Тоҷикистон дар соли 2017 бо забони тоҷикӣ дар шакли китобча пешниҳод карда шуд.
Дар нишасти матбуотӣ директори Маркази миллии тестии назди Президенти Ҷумҳурии Тоҷикистон Икромӣ Хуршед, муовини якуми директор Ҷаъфаров С.Ф., муовини директор Раҳмонов М.Н., ёвари директор Юлдошев А.Ш., сардорони шуъбаҳо ва дигар шахсони масъули муассиса ҳузур доштанд.
Дар ибтидо директори Марказ аз ҳамкории рӯзноманигорон бо Марказ ва масъалабардории онҳо аз тариқи ВАО изҳори қаноатмандӣ намуда, таъкид кард, ки оид ба фаъолияти муассиса маълумотнома бо забони давлатӣ омода ва ба ҳозирин пешниҳод гардидааст, аз ин рӯ, зарурати додани маълумоти умумӣ ва музокираҳо нест ва барои сарфаи вақт дарҳол ба посухи хабарнигорон гузаштан ба манфиати кор аст.
Сипас хабарнигорон ба саволҳои худ дар бораи баъзе масъалаҳои марбут ба имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон, ҷоришавии кори хаттӣ (эссе) ҳамчун ҷузъи имтиҳонҳои дохилшавӣ ва навгониҳои дигар дар низоми ин имтиҳонҳо, аз байн рафтани падидаҳои номатлуби қаллобию фасод ҳангоми дохилшавӣ ба муассисаҳои таълимӣ ва ғайра посух гирифтанд. Ба саволҳои хабарнигорон директори Марказ ва мутасаддиёни дигар ҷавобҳои қаноаткунанда доданд.
Маълумотнома оид ба фаъолияти Маркази миллии тестии назди Президенти Ҷумҳурии Тоҷикистон дар шакли китобча чоп ва дастраси намояндагони ВАО-и дар нишасти матбуотӣ ҳузурдошта гардонида шуд. Он дар сомонаи расми Марказ низ гузошта мешавад.
