Душанбе, 7-уми августи соли 2018
Рӯзи 3-юми августи соли 2018 дар Агентии миллии иттилоотии Тоҷикистон “Ховар” нишасти матбуотии Маркази миллии тестии назди Президенти Ҷумҳурии Тоҷикистон баргузор гардид, ки дар он қариб 30 нафар намояндаи воситаҳои ахбори оммаи ҷумҳурӣ, роҳбарият ва сардорони шуъбаҳою дигар кормандони масъули Марказ ширкат варзиданд. Директори Маркази миллии тестии назди Президенти Ҷумҳурии Тоҷикистон Хуршед Икромӣ нишасти матбуотиро оғоз бахшида, баҳри истифодаи босамари вақт навбатро ба ихтиёри рӯзноманигорон дод.
Доираи пурсишҳои намояндагон аз шабакаҳои гуногуни радиову телевизион ва воситаҳои ахбори чопӣ фарох буд ва аз ҷумла ба мавзӯъҳои озмуни тақсимот (асосӣ) ва тақсимоти такрорӣ, ба низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ (ИМД) дохил гаштани кори хаттӣ (эссе), мушкилоти мавҷуда дар фаъолияти Марказ ва комёбиҳои назарраси он дар соли ҷорӣ, ҳақиқат ва воқеияти баъзе овозаҳо дар атрофи масъалаҳои марбут ба ИМД, навгониҳо дар бахши технология ва дигар самтҳои фаъолияти Марказ, нақшаҳои минбаъдаи муассиса... дахл мекард.
Хабарнигорон ба суолҳои худ аз ҷониби роҳбарият ва дигар кормандони масъули Марказ посухҳои қаноатбахш гирифтанд.
Дар хотима директори Маркази миллии тестии назди Президенти Ҷумҳурии Тоҷикистон Хуршед Икромӣ ба аҳли қалам баҳри ҳамкориҳои пайвастаашон сипосгузорӣ карда, изҳори умед намуд, ки минбаъд низ барои дуруст ба роҳ мондани корҳои тарғиботию иттилоотӣ оид ба фаъолияти Маркази миллии тестии назди Президенти Ҷумҳурии Тоҷикистон дар байни ҷомеа намояндагони воситаҳои ахбори омма мусоидат хоҳанд кард.
