Душанбе, 4-уми феврали соли 2025
4-уми феврали соли 2025, тибқи Нақшаи ташкил ва гузаронидани нишастҳои матбуотӣ дар вазорату идораҳо, корхона, муассиса ва ташкилотҳои дигар, мақомоти иҷроияи ҳокимияти давлатии ВМКБ, вилоятҳо, шаҳри Душанбе ва шаҳру ноҳияҳо мутобиқи амри Президенти Ҷумҳурии Тоҷикистон аз 4 марти соли 2005, № АП-1677, оид ба ҷамъбасти соли 2024 дар дафтари асосии Маркази миллии тестии назди Президенти Ҷумҳурии Тоҷикистон нишасти матбуотӣ баргузор шуд.
Дар нишаст намояндагони ВАО-и ватанию хориҷӣ, директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ, мушовири бахши ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуллозода Масрур Аҳмад, муовини якуми директор ва сардорони воҳидҳои сохтории Марказ иштирок намуданд.
Нишасти матбуотӣ бо суханони муқаддамотии кӯтоҳи директори Марказ Ҷаъфарзода Сабзалӣ оғоз гардида, дар шакли савол ва ҷавоб сурат гирифт. Зимни ин суханронӣ директори Марказ оид ба дастовардҳои Марказ дар соли 2024 дар фаъолият дар доираи имтиҳонҳои марказонидаи дохилшавӣ (ИМД) иттилоъ дода, таъкид кард, ки дар соли 2024-ум дар доираи ИМД нишондиҳандаҳои асосӣ – бақайдгирӣ, иштирок дар имтиҳонҳо, ҳозиршавӣ дар муассисаҳои таълимӣ ва иҷрои нақшаи қабули донишҷӯён нисбат ба солҳои 2022-2023-юм баланд гардид. Аз ҷумла, дар соли 2024 дар заминаи синфи 11-ум нишондиҳандаи бақайдгирии довталабон – 8904 нафар (11,1 %), иштирок дар имтиҳонҳо – 1,04 %, ҳозиршавӣ барои қабул дар муассисаҳои таълимӣ – 2,32%, иҷрои нақшаи қабули донишҷӯён ба колеҷҳо – 5,06 % ба донишгоҳу донишкадаҳо 12,86 % нисбат ба соли 2023 баланд аст.
Инчунин, дар соли 2024 дар заминаи синфи 9-ум нишондиҳандаи бақайдгирии довталабон – 5385 нафар (32,5 %), ҳозиршавӣ барои қабул дар муассисаҳои таълимӣ – 1,08 %, иҷрои нақшаи қабули донишҷӯён ба колеҷҳо – 8,2 % нисбат ба соли 2023 баланд аст.
Дар нишаст аз ҷониби намояндагони ВАО дар бораи марҳалаҳои бақайдгирӣ ва имтиҳонҳо, натиҷаҳои озмунҳои тақсимоти асосиву такрорӣ, имтиҳонҳои эҷодӣ ва маҳорат, нақшаи қабули донишҷӯён ба муассисаҳои таълимии таҳсилоти миёна ва олии касбӣ ва масъалаҳои дигари марбут ба ИМД саволҳо пешниҳод карда шуд, ки роҳбарияти Марказ ба онҳо посух гуфтанд.
Дар фарҷом директори Марказ Ҷаъфарзода Сабзалӣ Файзалӣ ба намояндагони ВАО барои иштироки фаъолона дар нишаст ва ҳамкориҳои судманд изҳори миннатдорӣ намуд.
