Душанбе, 20-уми марти соли 2025
20-уми марти соли 2025 дар толори Маркази миллии тестии назди Президенти Ҷумҳурии Тоҷикистон ба муносибати ҷашни Наврӯзи байналмилалӣ бо иштироки кормандони Марказ ҷамъомади идона баргузор шуд.
Дар оғоз директори Марказ Ҷаъфарзода Сабзалӣ Файзалӣ кормандонро бо фарорасии ҷашни Наврӯз ва эҳёи табиат шодбош гуфта, қайд кард, ки Наврӯзи фархундапай бо тулуи аввалин нурҳои офтоби саҳарӣ, бо пайомадҳои тоза ба тоза ба кишвари хуршедиамон, ба хонадони ҳар як ҳамватани мо қадами мубораки худро мениҳад.
Ба шарофати истиқлоли давлатӣ эҳё гардидани Наврӯз дар Тоҷикистон, шукӯҳи тоза пайдо кардану ба яке аз ҷашнҳои бузургу муқаддаси миллии мардуми тоҷик табдил ёфтан ва болотар аз ин, мақоми ҷаҳонӣ гирифтани он ҳам гувоҳи азамати Наврӯз асту ҳам нишони бузургии миллати тамаддунсози тоҷик.
Воқеан, бо заҳмату талошҳо ва сиёсати фарҳангпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун ҷашни байналмилалӣ пазируфта шудани Наврӯз аз ҷониби Созмони Милали Муттаҳид баёнгари он аст, ки миллати тоҷик аз замони бостон то имрӯз бо хулуси ният ва ормони олӣ падидоварандаи ҷашне буд, ки паёми ваҳдату муҳаббат, покию садоқат, зебоию нафосат, хираду заковат, ростию адолат ва кӯшоиву меҳнат аст.
Директори Марказ Ҷаъфарзода С. Ф. қайд кард, ки Наврӯз хусусияти ба ҳам овардани мардум, устувор гардонидани пояи ваҳдату ҳамдилии халқҳоро дорост. Наврӯз на фақат ид, балки чизе боло ва волотар аз ҳама ҷашнҳост. Бо Наврӯз руҳи мо то ба имрӯз монд ва Наврӯз рамзи ҳастии мо гашт.
Дар ҷаласаи идона чанде аз кормандони Марказ дар бораи таърихи ҷашни Наврӯз, аҳаммияти таърихию фарҳангии анъанаҳои неки ин иди миллии тоҷикон ва паҳлуҳои дигари он изҳори андеша карда, зикр намуданд, ки Наврӯз яке аз маҳбубтарин ҷашнҳои таърихӣ ва фарҳангии миллати тоҷик буда, ҳамчун рамзи офариниши ҳаёт, оғози тозаи зиндагӣ аз давраҳои дур то ба имрӯз расидааст.
Дар охир ба як қатор кормандони Марказ сипосномаҳо тақдим гардид.
