Душанбе, 14 августи соли 2014

Маркази миллии тестии назди Президенти Ҷумҳурии Тоҷикистон ба диққати довталабон мерасонад, ки 15 август натиҷаҳои озмуни тақсимоти довталабон ба ихтисосҳои интихобкарда эълон карда мешавад.

Барои фаҳмидани натиҷаҳои тақсимот довталабон метавонанд аз кабинетҳои инфиродии худ истифода баранд.

Воридшавӣ ба кабинети  инфиродӣ тавассути сомонаи расмии марказ – www.ntc.tj ва ё нишонии интернетии http://cabinet.ntc.tj сурат мегирад.

Ба довталабон хизматрасонии SMS-паёмак низ дастрас мебошад. Барои фаҳмидани натиҷаи озмуни тақсимот довталаб метавонад SMS-дархости мувофиқро аз рӯйи қолаби n<рақами назоратӣ> (масалан, nxxxxxxxxxxxx) ба рақами кӯтоҳи 1617 ирсол намояд. Дар ҷавоб натиҷаи тақсимоти довталаб ҳамчун SMS-паёмак ба телефони мобилии ӯ равон карда мешавад. Арзиши як SMS-дархост – 1 сомонию 70 дирам.

Лозим ба қайд аст, ки маълумоти дар ҳуҷраҳои инфиродии довталабон гузошташуда нисбатан муфассалтар аст.

Довталабоне, ки тибқи натиҷаҳои озмуни тақсимот ба ин ё он ихтисоси интихобкардаашон тақсим карда мешаванд, бояд на дертар аз 25 август ба муассисаи таҳсилоти олии касбии дахлдор ҳозир шуда, аз қайди комисияи қабули он гузаранд.

Хотиррасон менамоем, ки тибқи Тартиб ва тарзи қабули имтиҳонҳои қабул барои муассисаҳои таълимии таҳсилоти олии касбии Ҷумҳурии Тоҷикистон, ки бо фармоиши вазири маориф ва илми Ҷумҳурии Тоҷикстон аз 25 ноябри соли 2013, №2935 тасдиқ гардида, дар Вазорати адлияи Ҷумҳурии Тоҷикистон аз 4 декабри соли 2013, №722 ба қайд гирифта шудааст, муассисаҳои таълимии таҳсилоти олии касбӣ донишҷӯёнро дар асоси рӯйхатҳои пешниҳоднамудаи Маркази миллии тестӣ ба курси якум қабул намуда, фармоиш ба имзо мерасонанд.

Маълумоти муфассалро метавонед аз эълонҳои қаблии сомонаи марказ ва ё бо телефонҳои 224-53-66 ва 224-53-67 пайдо кунед.