Дар толори маҷлисгоҳи Вазорати маорифи Ҷумҳурии Тоҷикистон бо иштироки муовинони вазири маориф, сардорони раёсатҳо ва мудирони шуъбаҳои дастгоҳи марказии вазорат, роҳбарони муассиса ва ташкилотҳои зертобеи вазорат, ректорони муассисаҳои таҳсилоти олии касбӣ дар шаҳри Душанбе, директорони муассисаҳои таҳсилоти миёнаи касбӣ, сардори раёсат ва мудирони шуъбаҳои маорифи шаҳру ноҳияҳои Душанбе ва кормандони Муассисаи давлатии «Маркази миллии тестӣ» (ММТ) муаррифии натиҷаҳои Озмоиши калони низоми нави имтиҳонҳои марказонидашудаи дохилшавӣ (ИМД) ба муассисаҳои таҳсилоти олии касбӣ доир гардид.
Сараввал, директори ММТ С. Ҷаъфаров оид ба натиҷаҳои бастоварда дар доираи Озмоиши калон ва бурду бохти он суханронӣ намуда, бо аксҳо ва ҷадвалу диаграммаҳо корҳои ба субут расонидаро намоиш дод. Аз таҳлилҳо маълум гардид, ки мутобиқи фармоиши вазири маориф дар байни хонандагони синфҳои 10-и муассисаҳои таҳсилоти миёнаи умумии Ҷумҳурии Тоҷикистон дар давоми моҳҳои март-августи соли 2013 Озмоиши калони низоми нави ИМД гузаронида шудааст. Озмоиши мазкур дар чор минтақаи ҷумҳурӣ (шаҳрҳои Душанбе, Хоруғ, Қӯрғонтеппа ва Хуҷанд) ба нақша гирифта шуда буд. Вобаста ба ин, аз тарафи ММТ дар чор минтақаи ҷумҳурӣ 7 нуқта бо 22 истгоҳи бақайдгирӣ таъсис дода шуд. Аз 15 то 30 апрели соли ҷорӣ давраи бақайдгирӣ гузаронида шуд, ки 7115 нафар хоҳишмандон аз ҳисоби хонандагони синфҳои 10 аз қайд гузаштанд. Шумораи зиёди аз қайд гузаштагон дар шаҳри Душанбе ба қайд гирифта шудааст, ки 37 фоизро ташкил медиҳад.
Барои дар сатҳи баланд гузарондани имтиҳонҳои Озмоиши калон, ММТ дар чор минтақаи ҷумҳурӣ 7 маркази имтиҳонӣ таъсис дода, барои ташкил ва назорати раванди имтиҳонҳо зиёда аз 240 нафарро аз ҳисоби омӯзгорон ва кормандони соҳаи маориф ба ҳайси маъмурони имтиҳон интихоб намуд.
Аз 15 то 22 июни соли ҷорӣ марҳилаи супоридани имтиҳонҳо доир гардид. Дар раванди имтиҳонҳо 4231 нафар хоҳишмандоне, ки аз қайд гузашта буданд, иштирок намуданд. Дар 180 синфхонаи 7 маркази имтиҳонӣ 1495 маротиба аз тарафи маъмурон имтиҳон гузаронида шуд. Аз тарафи хонандагон дар раванди имтиҳонҳо 11117 варақаи ҷавобҳо пешниҳод шудааст.
Натиҷаҳои имтиҳонҳои Озмоиши калон 1 августи соли 2013 дар сомонаи расмии ММТ (www.ntc.tj) нашр гардид.
Дар фарҷоми баромади худ, директори ММТ қайд намуд, ки дар ташкил ва гузаронидани Озмоиши калон норасоии назаррасе мушоҳида нагардид. Тибқи натиҷаҳои Озмоиши калон низоми нави ИМД мавриди такмилу таҷдид қарор дода мешавад ва низоми такмилёфта барои истифода дар соли 2014 омода мегардад.
Сипас, дар мавриди саволу ҷавоб ректори Донишгоҳи давлатии омӯзгории Тоҷикистон ба номи С. Айнӣ Раҳмонов А., ректори Донишгоҳи давлатии тиббии Тоҷикистон ба номи А. Сино Қурбонов А. ба директори ММТ саволҳо пешниҳод намуданд, ки аз тарафи директор ва кормандони ММТ посухҳои мушаххас дода шуд.
Дар охир, муовини аввали вазири маориф Ф. Раҳимов қайд намуд, ки Озмоиши калон дар сатҳи хуб гузаронида шуд ва тамоми расмиёт ва ҷузъиёти низом санҷида шуд. Танҳо қисман самтҳое, ки зарурати таҷдид доранд, коркард шавад ва аз ҳамаи иштирокчиён хоҳиш намуданд, ки баҳри амалӣ шудани низоми нави ИМД бо ҷомеа корро фаъолона ба роҳ монанд.
