Душанбе, 15-уми феврали соли 2025
Ба таваҷҷуҳи довталабон ва алоқамандони дигари имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон (ИМД) дар соли 2025 расонда мешавад, ки гунаҳои электронии маҷмуаҳои саволу масъалаҳои тест (https://ntc.tj/tj/elon1-2.html) аз субтестҳои қисмҳои А (имтиҳон дар заминаи таҳсилоти умумӣ – синфи 11-ум) ва Б (имтиҳон дар заминаи таҳсилоти умумии асосӣ – синфи 9-ум), инчунин дастури иттилоотию методии “Роҳнамои довталаб” (https://ntc.tj/tj/rohnamoi-dovtalab.html) дар сомонаи Маркази миллии тестӣ ҷойгир карда шуданд.
Хотиррасон мекунем, ки гунаи чопии маҷмуаҳои саволу масъалаҳои тест ва Роҳнамои довталаб ба муассисаҳои таълимии таҳсилоти умумии асосӣ, миёнаи умумӣ, ибтидоӣ ва миёнаи касбӣ ройгон тақсим карда мешаванд. Тақсимоти гунаи чопии маҷмуаҳо ва Роҳнамои довталаб ба мактабҳо рӯзҳои наздик оғоз мегардад.
Ба шахсони хоҳишманди иштирок дар ИМД 2025 тавсия медиҳем, ки бо мақсади шиносоӣ бо тарзи иҷрои саволу масъалаҳои тест ва қоидаҳои пур кардани варақаи ҷавобҳо, инчунин санҷиши сатҳи омодагияшон ба имтиҳонҳо аз маҷмуаҳои мазкур мунтазам истифода намоянд. Довталабони ИМД 2025 метавонанд гунаи электронии маҷмуаҳои мазкурро аз сомонаи Марказ боргирӣ карда, аз онҳо истифода кунанд. Бояд қайд кард, ки дар ҳар яке аз субтестҳои имтиҳонҳои воқеӣ (ИМД) соли ҷорӣ то 40 %-и саволу масъалаҳо аз ҳамин маҷмуаҳо такроран истифода карда мешаванд.
Дар маҷмуаҳои саволу масъалаҳои тести соли ҷорӣ низ ҷавобҳои дуруст (калидҳо) пешниҳод нашудаанд. Аз ин рӯй, ҷавобҳои дурусти саволу масъалаҳои маҷмуаҳо рӯзҳои наздик дар сомонаи Марказ гузошта мешавад.
Дар баробари дониши арзанда доштан, воқиф будан аз тартибу қоидаҳои дахлдор барои бақайдгирӣ ва имтиҳонот, аз ҷумла интихоби дурусту дурандешонаи ихтисосу муассисаҳо бо ба эътибор гирифтани донишу маҳорат ва имконоти худ ва риояи ин шарту қоидаҳо барои ҳар як довталаб муҳим мебошад. Аз ин лиҳоз, ба довталабон тавсия медиҳем, ки аз дастури иттилоотию методии «Роҳнамои довталаб» ҳадафмандона корбарӣ намоянд.
