Душанбе, 15-уми феврали соли 2023
Тавре ки маълум аст, дар доираи имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон саволу масъалаҳои навъи кушода бо ҷавоби кӯтоҳ то соли 2022 танҳо дар субтестҳои математика, физика ва химияи қисмҳои А (имтиҳон дар заминаи таҳсилоти умумӣ) ва Б (имтиҳон дар заминаи таҳсилоти умумии асосӣ) пешниҳод мегардид. Дар соли 2023 саволу масъалаҳои навъи кушода бо ҷавоби кӯтоҳ дар субтестҳои биология ва таърих низ дохил карда шуд.
Ба диққати довталабон ва алоқамандони имтиҳонҳои мазкур расонида мешавад, ки намунаи саволу масъалаҳои кушода бо ҷавоби кӯтоҳ аз фанҳои биология ва таърих дар сомонаи Марказ ҷойгир карда шуд.
Азбаски риояи талаботу қоидаҳо ҳангоми иҷрои саволу масъалаҳои тест ва қайди ҷавоби онҳо дар варақаи ҷавобҳо аз ҷумлаи масъалаҳои барои довталабон муҳим буда, риоя накардани ин талаботу қоидаҳо ба натиҷаи довталаб таъсири манфӣ мерасонад, ба довталабон тавсия медиҳем, ки бо намунаҳои саволу масъалаҳои кушодаи тест аз фанҳои биология ва таърих шинос шаванд.
