Душанбе, 24-уми сентябри соли 2020

Имрӯз дар толори Маркази миллии тестии назди Президенти Ҷумҳурии Тоҷикистон филми ҳуҷҷатии “Хиёнат” намоиш дода шуд. Дар ин филм дар бораи ҳадафу мақсадҳои нопок ва фаъолияти вайронкоронаи аъзои ТЭТ ҲНИ, ки фаъолияти он дар кишвар мамнӯъ эълон карда шудааст, бо далелҳо нақл карда мешавад.

Дар филми мазкур далелҳои шайъӣ ва мусоҳибаҳои шоҳидони амалҳои зишту террористии афроди фурӯхташуда, аз ҷумла қатлу куштор ва ранҷу ситам додани мардуми бегуноҳ, ғорату гаравгонгирӣ ва аз байн бурдани равшанфикрони миллат нишон дода шудаанд, ки тамошои саҳнаҳои гуногуни он ҳар як инсони соҳибақлу бохирадро бетаъсир намегузорад ва водор менамояд, ки аз ин давраи нангини таърихӣ сабақ гирад ва саъю талош намояд, ки худ ва дигарон боиси чунин бадбахтие нагарданд. Филми мазкур нишон медиҳад, ки он чӣ дар даврони ҷанги шаҳрвандӣ ба сари миллати тоҷик хоинони ин миллат овардаанд, ҳамчун як амали хоинона ва зиддиинсонӣ нобахшиданӣ буда, бояд маҳкум карда шавад. Пас аз тамоиши ин филм ҳеҷ шахсе, ки дар замираш раҳму шафқат ва инсонияту имон аст, наметавонад нисбат ба нафарони ҷанги шаҳрвандию ҳазорҳо бадбахтии дигарро бар сари миллати тоҷик оварда нафрат надошта бошад.

Баъд аз тамошои филм кормандони Марказ, аз ҷумла директори Марказ Икромӣ Х. И., сардори раёсати таҳияи маводди имтиҳонӣ Азимов Ҷ. А., сармутахассисони раёсати мазкур Мирзоматов Н. ва Зарифов Н. Ҳ. дар бораи филми мазкур ва таассуроташон аз он изҳори назар карда, инчунин дар бораи ҳаводиси нангини даврони ҷанги шаҳрвандӣ дар Тоҷикистон, ки боиси марги ҳазорҳо одамони бегуноҳу аз даст додани зиёиёни бузурги миллати тоҷик гардидааст, нақл карданд.

Баромадкунандагон даъват аз он карданд, ки ҳар як нафар, пеш аз ҳама, зиракии сиёсиро бояд аз даст надиҳад ва фирефтаи ҳар гуна ҳаракату ҳизбҳое, ки ҳадафу мақсади нопок дошта, дар пайи харобии кишварҳо ва аз байн бурдани оромию осудагии мардум ҳастанд, нашавад.