Душанбе, 27-уми июли соли 2024
27-уми июли соли 2024 дар Маркази миллии тестии назди Президенти Ҷумҳурии Тоҷикистон директори Марказ Сабзалӣ Ҷаъфарзода бо директори Раёсати тадқиқоти муқоисавии байналхалқии назди Вазорати маорифи Ҷумҳурии Казоқистон Карбаева Галия ва коршиноси Лоиҳаи Иттиҳоди Аврупо оид ба таҳсилоти миёнаи умумӣ, Айгул Казжанова мулоқот кард. Мавзуи ин мулоқот омодасозии ҳамоҳангсозони мактабҳо барои баргузории пажӯҳиши асосии Барномаи байналмилалии арзёбии хонандагон (PISA 2025) буд.
Лозим ба зикр аст, ки бо мақсади роҳандозии Барномаи байналмилалии арзёбии хонандагон (PISA 2025) дар назди Маркази миллии тестии назди Президенти Ҷумҳурии Тоҷикистон Маркази миллии PISA фаъолият мекунад.
Директори Маркази миллии тестии назди Президенти Ҷумҳурии Тоҷикистон Сабзалӣ Ҷаъфарзода иброз дошт, ки иштироки Ҷумҳурии Тоҷикистон дар PISA 2025 барои арзёбии сифати таҳсилот дар асоси муносибати босалоҳият, ислоҳоти соҳаи маориф, ҷорӣ намудани низоми самараноки таълим, ки дар Стратегияи миллии рушди маорифи Ҷумҳурии Тоҷикистон барои давраи то соли 2030 зикр мешавад, иқдоми хубу саривақтӣ ва натиҷаовар хоҳад буд.
Директори Раёсати тадқиқоти муқоисавии байналхалқии назди Вазорати маорифи Ҷумҳурии Казоқистон Карбаева Галия иброз доштд, ки мақсад аз иштирок дар барномаи мазкур на танҳо арзёбии дониши азхудкарда, инчунин арзёбии салоҳият (малакаю маҳорату қобилият)-и истифодаи дониш дар шароити наву гуногун ва ҳолатҳои воқеиро мавриди андозагирию арзёбӣ қарор медиҳад.
Дар мулоқот Айгул Казжанова, коршиноси Лоиҳаи Иттиҳоди Аврупо оид ба таҳсилоти миёнаи умумӣ дар бораи таҷриба ва натиҷаҳои иштироки Ҷумҳурии Қазоқистон дар барномаҳои байналмилалии арзёбии сифати таҳсилот, ҳамоҳангсозони воситаҳои арзёбӣ ва тартиби баргузории таҳқиқоти PISA ибрози назар кард.
Бояд гуфт, ки Ҷумҳурии Тоҷикистон дар пажӯҳиши PISA бори аввал иштирок менамояд ва Маркази миллии тестии назди Президенти Ҷумҳурии Тоҷикистон масъули гузаронидани PISA 2025 таъйин гардидааст.
