Душанбе, 9-уми феврали соли 2022

Коррупсия, фасоду ришвахорӣ аз зуҳуроти номатлуби ҷаҳони имрӯз ва гузашта буд.  Ин мушкил имрӯз ҷомеаи башариро ба таҳлука овардааст, зеро он садди пешрафти давлату мамлакатҳо ва ноқизи ҳуқуқу озодиҳои инсон аст. Дунёи муосир дар радифи зуҳуроти дигари хатарнок, амсоли экстремизму терроризм, гардиши ғайриқонунии маводи мухаддир ва ғайра бо коррупсияву аъмоли дигари ба он шабеҳ мубориза мебарад.

Мубориза бо он вазифаи танҳо як ниҳод ё гурӯҳи алоҳида нест, балки рисолати инсонии тамоми аҳли ҷомеа мебошад, зеро бо густариши ин зуҳуроти нанговар зиёни он тамоми соҳаҳои ҷамъиятию давлатиро фаро мегирад ва  паёмадҳои басо хатарнокро ба бор меоварад.

Бо таъсис ва фаъолияти Маркази миллии тестии назди Президенти Ҷумҳурии Тоҷикистон амалҳои коррупсионӣ ва фасод дар самти дохил шудан ба муассисаҳои таълимии таҳсилоти миёна ва олии касбии Ҷумҳурии Тоҷикистон аз байн рафт.

Маркази миллии тестии назди Президенти Ҷумҳурии Тоҷикистон бо татбиқи принсипҳои адолату шаффофият дар фаъолияти худ ва таъмини дастрасии баробари хоҳишмандон ба таҳсил омилҳои коррупсиониро вобаста ба имтиҳонҳои дохилшавӣ ба донишгоҳу донишкада ва коллеҷҳо батамом рафъ кард.

 Марказ дар ҳамаи давру марҳилаҳои имтиҳонҳои марказонидаи дохилшавӣ ба муассисаҳои таҳсилоти миёнаю олии касбии ҷумҳурӣ корҳои иттилоърасонию тарғиботиро ба таври назаррас амалӣ карда, дар ҷараёни онҳо, бахусус ба масъалаҳои пешгирӣ аз коррупсия таваҷҷуҳи беш медиҳад. Кормандони Марказ тибқи нақшаи муайян дар суҳбату вохӯриҳо, ҷаласаю семинарҳо довталабон ва умуман, ҳамаи алоқамандони имтиҳонҳои номбурдаро ҳамеша огаҳӣ медиҳанд, ки ҳаргиз фирефтаи қаллобии ҳеҷ шахсе нашаванд.

Зеро  бо вуҷуди корҳои зиёди тарғиботию иттилоърасонии Марказ боз ҳам гоҳо хабару овозаҳо дар бораи ҳолатҳои фиреб додани довталабон дар масъалаи дохил намудани онҳо ба муассисаҳои таҳсилоти миёнаю олии касбии ҷумҳурӣ аз тарафи шахсони қаллоб ба гӯш мерасад. Чунин ашхоси барои амалӣ намудани ниятҳои нопоки худ бо номҳои бардурӯғ ва сохтакорона ва “муаррифӣ”‑и худ, ки гӯё “дар Маркази миллии тестӣ кор мекунанд” ва ё бовар мекунонанд, ки бо “ин” ё “он” корманди Марказ ҳамкорӣ доранд, ноогаҳонро ба доми фиребашон афтонда, ба обрӯ ва эътибори Маркази миллии тестиро доғдор мекунанд, боварии ҷомеаро нисбат ба низоми нави имтиҳонҳои марказонидаи дохилшавӣ коста менамоянд.

Марказ ҳамасола ба ғайр аз корҳои маъмулии иттилоърасонию таблиғотии худ тавассути муроҷиатнома бо тамоми масъулият ба мардуми шарифи Тоҷикистон, алалхусус довталабон, изҳор менамояд, ки имтиҳонҳои марказонидаи дохилшавӣ комилан ба таври шаффоф ва одилона ба роҳ монда шуда, имконияти дахолати беруна ва тақаллуб дар он ҷой надорад.

Тавре худи довталабон, омӯзгорон, падару модарон, фаъолони ҷамъиятӣ, намояндагони воситаҳои ахбори омма ва дигар алоқамандон бевосита соли нуҳум аст, шоҳиданд, ки имтиҳонҳои номбурда ҳамасола шаффофу одилона ташкил ва баргузор гардида, ҳамчунин дар арзёбии донишу маҳорати довталабон низ ин принсипҳо комилан риоя мегардад.

Аз ин рӯ, ҳамеша таъкид мегардад, ки ба ҳар гуна шахсоне, ки оид ба расонидани ёрӣ дар дохилшавии довталабон ваъда медиҳанд, касе бовар накунад, чунки иҷрои чунин ваъда ва кафолатҳо аз ҷиҳати дастрасӣ ва техникию технологӣ аз имкон берун аст, ин танҳо қаллобӣ ва амалҳои коррупсионӣ асту тамом.

Дар низоми ИМД барои аз байн бурдани ҳар гуна амалҳои номатлуб, бахусус барои ба ҳадди ақал расонидани таъсири омилҳои инсонӣ дар равандҳои гуногун чораҳои зарурӣ андешида шуда, бо ин мақсад шароит ва имкониятҳои созгор фароҳам оварда шудааст. Сохтани кабинети инфиродӣ барои ҳар як довталаб ва дар он ҷой додани маълумот аз давраи бақайдгирӣ то эълони натиҷаҳо, ба таври мунтазам дар сомонаи Марказ ҷойгир кардани маводу матлабҳои гуногун ва додани иттилооти саривақтӣ вобаста ба ҳар як давру марҳила аз ҷумлаи онҳоянд. Ба ин қонеъ нашуда маъмурияти муассиса пайваста ҷиҳати пешгирӣ аз амалҳои коррупсионӣ, ташаккули тафаккури зиддикоррупсионӣ, тақвияти одобу рафтори накӯи кормандон; таҳияи санадҳои меъёрию ҳуқуқии батанзимоварандаи фаъолияти ин ниҳод ва истифода аз технологияҳои муосир ва худкорсозии равандҳо тадбирҳои зарурӣ меандешад.

Коррупсия имрӯз ҳамчун яке аз мушкилоти замони муосир ва зуҳуроти манфии дорои хусусияти миллию байналмилалӣ аст ва ба яке аз масъалаҳои глобалии ҷаҳон табдил ёфтааст. Ин масъала аксари давлатҳои ҷаҳонро ба ташвиш овардааст, ки Ҷумҳурии Тоҷикистон низ истисно нест. Бинобар ин, Марказ кору тадбирҳои зидди коррупсиониашро танҳо дар доираи нақша-чорабиниҳо маҳдуд накарда, дар ҳамаи давру марҳилаҳои  фаъолияташ тарғиботи зиддикоррупсионишаро вусъат медиҳад.

Кормандони Марказ бо софдилона ва беғаразона иҷро кардани уҳдадориҳои мансабии худ минбаъд низ дар муқобилат бо коррупсия ва пешгирӣ аз амалҳои фасодкорӣ ва ба ин васила, аз ҷумла дар татбиқи “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030 барои марҳилаи якум (солҳои 2021-2025)” ҳиссагузор хоҳанд шуд.

Маркази миллии тестии назди Президенти Ҷумҳурии Тоҷикистон