Душанбе, 24-уми майи соли 2023

24-уми майи соли 2023 дар маҷлисгоҳи дафтари асосии Маркази миллии тестии назди Президенти Ҷумҳурии Тоҷикистон (минбаъд: Марказ) вохӯрии кормандони ин ниҳод бо намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон сурат гирифт. Сарнозири раёсати таҳлили хавфҳои коррупсия ва пешгирии ҳуқуқвайронкуниҳои коррупсионии Агентии назорати давлатии молиявӣ ва мубориза бо коррупсияи Ҷумҳурии Тоҷикистон Назриён Васлибек Қурбон Агентии мазкурро намояндагӣ кард.

Ба кори ҷаласа директори Марказ Ҷаъфарзода Сабзалӣ Файзалӣ оғоз бахшида, гуфт, ки коррупсия яке аз зуҳуроти хавфноки ҷомеа ва халалдорсозандаи рушди иҷтимоию иқтисодӣ ба ҳисоб меравад ва ба амнияти миллӣ низ таҳдид мекунад. Аз ин рӯ, мубориза бо ин зуҳуроти номатлуби ҷомеа ва пешгирӣ аз он кори дастҷамъона ва вазифаи муҳимми ҳамаи шаҳрвандон аст. Бо ин мақсад Маркази миллии тестии назди Президенти Ҷумҳурии Тоҷикистон низ бо Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва мақомоти дигари ваколатдор ҳамкориҳои пайваста дорад.

Сарнозири раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон Назриён В. Қ. марбут ба роҳҳои  пешгирӣ аз амалҳои коррупсионӣ, ташаккули мафкураи зиддикоррупсионӣ ва маърифати ҳуқуқии ҷомеа, таъмини иҷрои қонунҳо ва барномаҳои давлатии зиддикоррупсионӣ изҳори назар кард.

Дар ҷаласа, махсусан ба масъалаи суиистифода накардан аз ваколатҳои мансабӣ, аз ҷумла бо мақсадҳои шахсӣ, гурӯҳӣ ва мақсадҳои дигари ғайрихизматӣ истифода накардани биноҳо, воситаҳои нақлиёт ва алоқа, воситаҳои электронӣ, маблағҳо ва молу мулки дигари давлатӣ, ки барои иҷрои вазифаҳои давлатӣ вобаста карда шудаанд, таваҷҷуҳи махсус дода, моҳияту паҳлуҳои гуногуни он ба таври муфассал шарҳу тавзеҳ дода шуд. Масъалаҳои вобаста ба ин мавзуъ тибқи муқаррароти Кодекси ҳуқуқвайронкунии маъмурии Ҷумҳурии Тоҷикистон, Қонуни Ҷумҳурии Тоҷикистон “Дар бораи муқовимат ба коррупсия” ва Кодекси одоби хизматчии давлатии Ҷумҳурии Тоҷикистон фаҳмонида шуд.

Ӯ, аз ҷумла, гуфт, ки Ҷумҳурии Тоҷикистон бо мақсади муқовимат ба коррупсия мунтазам чораҳои амалӣ андешида, барои ба вуҷуд овардани фазои зиддикоррупсионӣ заминаҳои ташкиливу ҳуқуқиро муҳайё кардааст ва минбаъд низ вобаста ба рушди босуръати муносибатҳои нав ин усул идома меёбад. Қонуни Ҷумҳурии Тоҷикистон “Дар бораи муқовимат ба коррупсия” истифодаи захираҳои молиявӣ, моддию техникӣ, нақлиётӣ, захираҳои дигари давлатӣ ё ҷамъиятӣ ва иттилооти хизматиро бо мақсадҳои ғайрихизматӣ ба шахси барои иҷрои вазифаҳои давлатӣ ваколатдор ва шахси ба он баробаркардашуда низ манъ намудааст ва чунин кирдорҳо ҳуқувайронкунии ба коррупсия алоқаманд ҳисобида мешаванд, – аз ҷумла, қайд кард мазкур.

Ахиран дар байни аҳли ҷаласа ва Назриён В. Қ.  суҳбат ва суолу ҷавоб сурат гирифт.