Душанбе, 7-уми марти соли 2025
7-уми марти соли 2025 дар дафтари асосии Маркази миллии тестии назди Президенти Ҷумҳурии Тоҷикистон бо иштироки кормандони Марказ ба муносибати Рӯзи Модар ҷаласаи идона баргузор гардид.
Ҷаласаро директори Марказ Ҷаъфарзода Сабзалӣ Файзалӣ кушод ва бонувони Марказро ба муносибати Рӯзи Модар муборакбод гуфта, иброз дошт, ки воқеан, занону модарон оинаи беғубор, инъикоси симои зоҳирӣ ва ботинии ҳар давлату миллатанд. Зан – Модар сатҳи хираду маърифати миллату давлатро таҷассум менамояд. Таърихи башарияти ҷаҳон бо номи Зан – Модар ҳамбастагии қавӣ дорад. Рисолати офарандагиву тарбиятгарӣ, иродаи қавӣ, афкори наҷибу хулқи ҳамида аз меҳру муҳаббат ва вуҷуди модар сарчашма мегирад.
Ба талошҳои шабонарӯзии модарон ва бонувони тоҷик Пешвои миллат муҳтарам Эмомалӣ Раҳмон борҳо баҳои баланд дода, аз ҷумла изҳор кардаанд: “Бонувони кишварамон баробари мардон номуси ватандориро ба дӯши худ гирифта, дар соҳаҳои мухталифи ҳаёти ҷомеа ва давлат ғайратмандона фаъолият доранд ва бо ташаббусҳои созандаи худ Тоҷикистони маҳбубамонро боз ҳам ободу зебо гардонида истодаанд. Занону модарони мо бо дастони пурмеҳри худ ниҳоли ишқу муҳаббат, меҳру садоқат, саховату асолат ва илму маърифатро парвариш мекунанд ва қалби поки онҳо ҳамеша барои орому осуда ва пояндаву устувор нигоҳ доштани оила, ҷомеа ва давлат метапад”.
Модар бузургтарин офаридаи Худои Раҳмон, азизтарин мавҷуд барои инсон, неъмати ноёб баҳри одамиён, бахшандаи ҳаёт ба ҳамагон ва фарзандонро нирӯи дилу ҷон ва муҳаббати бекарон аст. Аз бузургии меҳру сахои ӯ ба фарзанд, ба ҷуз худи ӯ, дигар ҳар касе дар замину осмон, дар ҷаҳони ҷовидон аз тасаввураш оҷиз аст ва ин розест ниҳон барои дигарон. Гармию нур, хушию сурур ва тавону зӯр барои фарзанди инсон – ҳама аз ин муъҷизаи Илоҳӣ, аз Модар аст.
Модар на танҳо тарбиятгари фарзанди хеш, балки ҳидоятгару камолбахши халқу миллат аст, тавре ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фармудаанд: «Бузургии зан – модар пеш, аз ҳама, дар он таҷассум меёбад, ки ӯ чароғи хонадон, идомадиҳандаи насл, тарбиякунанда ва бакамолрасонандаи фарзанд, инчунин нигоҳдорандаи забон, таърих ва фарҳанги миллӣ мебошад».
Таваҷҷуҳи Ҳукумати мамлакат таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъалаи баланд бардоштани мақом ва манзалати зан дар ҷомеа, тавсеаи нақши он дар ҳаёти ҷамъиятию сиёсӣ, иқтисодию иҷтимоӣ ва фарҳангию маънавӣ торафт бештар ба назар мерасад. Имрӯз занон дар қатори мардон дар тамоми соҳаҳои хоҷагии халқ сарбаландона фаъолият бурда, дар пешрафти ҷомеаи навини мо ва барои шукуфоии Тоҷикистони соҳибистиқлол беш аз пеш саҳмгузорӣ мекунанд.
Дар идомаи ҷаласаи идона як қатор кормандон низ бонувонро ба муносибати ҷашнашон табрик гуфта, дар боби бузургии зан – модар ва мақоми зан – модар дар ҷомеа суханронӣ карданд.
Дар охири ҷаласа бонувони Марказ ба муносибати Рӯзи Модар бо туҳфаҳои идона қадрдонӣ карда шуданд.
