Душанбе, 26-уми июни соли 2024
Ваҳдати миллӣ дастовард ва бозёфти арзишмандтарин барои Тоҷикистони соҳибистиқлол маҳсуб меёбад. Ваҳдати миллӣ, ҳамчун ҷашни давлатӣ, ҳамасола 27- уми июн дар Ҷумҳурии Тоҷикистон таҷлил мешавад. Ба ҳамин муносибат Маркази миллии тестии назди Президенти Ҷумҳурии Тоҷикистон (Марказ) бо иштироки садорат ва кормандонаш 26-уми июни соли 2024 дар толори дафтари асосии худ ҷаласа баргузор кард. Дар ҷаласа, ҳамчунин ширкати сардорони бахшҳои минтақавии Марказ ба таври бархат (онлайн) таъмин гардид.
Ҷаласаро директори Марказ Ҷаъфарзода Сабзалӣ Файзалӣ кушода, баъди ҳозиринро ба муносибати ҷашни Ваҳдати миллӣ таҳният гуфтан пиромуни ин дастоварди даврони соҳибистиқлолии кишвар, ки яке аз идҳои асосии давлатӣ дар Тоҷикистон ба шумор меравад, изҳори назар кард.
Ҷаъфарзода С. Ф., аз ҷумла гуфт, мардуми Тоҷикистон бо мафҳуми “Ваҳдат” танҳо дар забон ва истилоҳу луғат не, балки дар зиндагиаш, дар рӯзгору дар амалаш ошно аст ва он ба муқаддасоташ табдил ёфтааст. Ваҳдати миллӣ, яъне ваҳдати тамоми тоҷикистониён, ваҳдати ҳамаи шаҳрвандони Тоҷикистон, ягонагии ҷамъи мардуми кишвар, иттиҳоди ҳамаи халқу миллату қавмҳои Ҷумҳурии Тоҷикистон аст. Ваҳдати миллӣ афкору андеша, ҳадафу ният, ормону орзуи ягонаву воҳид доштани кулли мардуми кишвар, тамоми ҷомеаи мамлакат барои пос ва нигаҳдории арзишҳои милливу давлатӣ, ҳифзи истиқлоли давлатӣ ва дастовардҳои он, муттаҳид будан бо ғояву армонҳои ягона баҳри ободиву пешрафти ҳамаҷонибаи давлату мамлакат, шинохти бештари таъриху фарҳанги миллат бо мақсади ҳифозати он аз харобию нобудӣ, иттиҳоди тому куллӣ доштан ва рушди мафкураи миллӣ бо мақсади тараққиёти комилу ҳаматарафаи давлати миллӣ ва амсоли ин аст.
Дар бунёду пойдории ин Ваҳдати миллӣ, пеш аз ҳама, саҳми Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зиёду намоён аст. Маҳз кӯшишу талоши беандоза, ҷасорату фаросати сиёсии Президенти мамлакат буд, ки ҷои ҷангу хунрезию нифоқу адоватро дар кишвари мо сулҳу амну оромӣ гирифт. Ваҳдати миллӣ таъмингари истиқлоли давлатӣ ва тамомияти арзӣ, якпорчагии Ватан, суботу пойдории давлати Тоҷикистон, таҳкими демократия, рушди иқтисодӣ, иҷтимоӣ ва фарҳангӣ, ҳифзи арзишҳои таърихии давлатдории миллӣ низ шуд. Мо бояд ба қадру манзалати сулҳу субот, истиқлоли давлатдории миллии худ расем, худро ҳамтақдир ва ҳаммароми миллати хеш донем ва аз неъмати бузурги Ватану ватандорӣ ифтихор намоем. Ҳифзи дастоварди нодир ва таърихии халқамон, яъне ваҳдати миллӣ вазифаи муҳимтарин ва аввалиндараҷаи тамоми мардуми Тоҷикистон аст, – қайд кард директори Марказ Ҷаъфарзода С. Ф.
Дар ҷаласа сардори раёсати маводди имтиҳон Азимов Ҷ. ва сармутахассиси фанни таърихи ин раёсат Зарифов Н. дар бораи Ваҳдати миллӣ, ҳамчун рӯйдод, дастовард, муқаддасоти миллию давлатӣ ва аҳаммияти он барои иттиҳоди халқу миллат ва ҳифзи арзишҳои миллӣ ибрози андеша карда, аз ҷумла таъкид карданд, ки маҳз ба шарофати истиқлоли давлативу ваҳдати миллӣ заминаҳои рушду пешрафти кишвар фароҳам омад ва мамлакат ба комёбиҳои назарраси сиёсиву иқтисодӣ ва фарҳангӣ ноил шуд. Ваҳдати миллӣ барои амалисозии ормонҳои миллӣ ва ҳадафҳои бузурги давлатӣ заминаи воқеӣ гузошт.
Дар идомаи ҷаласа чанде аз кормандони дигари Марказ низ дар атрофи Ваҳдати миллӣ ибрози назар карданд.
