Душанбе, 22-юми январи соли 2025

22-юми январи соли 2025 дар Китобхонаи миллии Тоҷикистон мизи мудаввар баргузор гардид, ки мавзуи он иштироки хонандагони синфи 4-уми мактабҳои Ҷумҳурии Тоҷикистон дар Таҳқиқоти байналмилалии пешрафти саводи хондан (PIRLS) 2026 буд.

Дар ин ҷаласа вазири маориф ва илми Ҷумҳурии Тоҷикистон Саидзода Раҳим, директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ, муовини директори Агентии назорат дар соҳаи маориф ва илми назди Президенти Ҷумҳурии Тоҷикистон Назарализода Дилафрӯз, сардорони сарраёсат, раёсат ва шуъбаҳои маорифи шаҳру ноҳияҳои ҷумҳурӣ ва дигар масъулони соҳа иштирок намуданд.

Дар оғоз вазири маориф ва илм аз ҳадафҳои Стратегияи миллии рушди маорифи Ҷумҳурии Тоҷикистон барои то давраи соли 2030 суханронӣ кард ва иброз дошт, ки вобаста ба ҳамин Ҷумҳурии Тоҷикистон то давраи соли 2030 дар қатори беш аз 60 кишвари дигари дунё дар арзёбии байналмилалии PIRLS 2026 ширкат хоҳад кард.

Сипас директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ дар суханрониашон аз ҷумла таъкид кард, мактабу маориф, ки омили муҳими рушди ҳамаи соҳаҳои кишвар, рақобатпазирӣ ва нуфузу эътибори байналмилалии он ва яке аз самтҳои афзалиятноки сиёсати давлатӣ дар кишвари мо буда, ҳамеша дар маркази таваҷҷуҳи Президент ва Ҳукумати Ҷумҳурии Тоҷикистон қарор доранд, ки ин нуктаро аз суханрониҳои Асосгузори сулҳу ваҳдати миллӣ, Пешвои миллат, муҳтарам Эмомалӣ Раҳмон низ борҳо шунидаем.