Душанбе, 5-уми сентябри соли 2023
4-уми сентябри соли 2023 дар дафтари асосии Маркази миллии тестии назди Президенти Ҷумҳурии Тоҷикистон (Марказ) бо иштироки кормандон ҷаласа баргузор гашт, ки ба супурдани мукофоти давлатии Ҷумҳурии Тоҷикистон ба як нафар корманди Марказ ихтисос дода шуда буд. Дар он сармутахассиси таҳриру тарҳрезии корҳои табъу нашр (сармуҳаррир)-и Марказ Фазлиддинзода Абдулбосит Фазлиддин бо мукофоти давлатӣ – медали “Хизмати шоиста” қадрдонӣ карда шуд.
Дар ҷаласаи ифтихорӣ Насриддинзода Эмомалӣ Сайфиддин, ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа ва Оқилзода Нурулло, мушовири калони бахши ёрдамчии Президенти Ҷумҳурии Тоҷикистон, ҳамчун намояндаи Президенти Ҷумҳурӣ, барои супоридани медали “Хизмати шоиста” ба корманди мазкур ширкат ва суханронӣ карданд.
Ҷаласаро Ҷаъфарзода Сабзалӣ Файзалӣ – директори Маркази миллии тестии назди Президенти Ҷумҳурии Тоҷикистон бо сухани муқаддамотӣ кушода, оид ба сиёсати илму маорифпарваронаи Ҳукумати Ҷумҳурӣ таҳти сарварии муҳтарам Эмомалӣ Раҳмон, дастгирии аҳли зиёву фарҳанг аз ҷониби Пешвои миллат, дастовардҳои даврони истиқлол дар соҳаи маориф мухтасар ибрози назар кард.
Насриддинзода Эмомалӣ Сайфиддин, ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа фармони Президенти Ҷумҳурии Тоҷикистонро аз 21.08.2023, № 618 дар бораи бо медали “Хизмати шоиста” сарфароз карда шудани Фазлиддинзода Абдулбосит Фазлиддин хонд ва мукофоти мазкурро ба Абдулбосит Фазлиддин ба таври мутантан супорид.
Насриддинзода Э. С. таваҷҷуҳи Пешвои миллат ба Маркази миллии тестӣ ва сарфарозгардонии як нафар корманди онро боз як нишони ғамхориҳои Президенти кишвар нисбат ба нирӯҳои зеҳнии мамлакат, нисбат ба мутахассис, нисбат ба шаҳрвандони ҷумҳурӣ ҳисобид. Чунин ғамхориҳо омили ҳавасмандии табааи кишвар, омили ангезиши ҳар як шаҳрванд баҳри кӯшишу талошҳои нав ба нав дар арсаи ободию пешрафти ватан хоҳад шуд, – гуфт ӯ.
