Душанбе, 9-уми декабри соли 2022
Маркази миллии тестии назди Президенти Ҷумҳурии Тоҷикистон 9-уми декабри соли 2022 дар бинои асосии Донишгоҳи миллии Тоҷикистон бо мақсади ҳавасмандгардонии довталабони беҳтарине, ки дар ИМД-2022 аз рӯйи дастовардҳо – холҳои бадастовардаашон мақоми баландро сазовор гаштанд, қадрдонӣ кард.
Дар маросими мазкур сардори раёсати маориф, фарҳанг ва иттилооти Дастгоҳи иҷроияи Президенти Ҷумҳурии Тоҷикистон Анвар Сафарзода; намояндаи Вазорати маориф ва илми Ҷумҳурии Тоҷикистон Сафарбой Саматов; Ректори Донишгоҳи миллии Тоҷикистон профессор Қобилҷон Хушвахтзода; Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода; Раиси Иттифоқи касабаи кормандони маориф ва илми Ҷумҳурии Тоҷикистон Зулҳия Нозакзода; Ректори Донишгоҳи техникии Тоҷикистон ба номи академик М. С. Осимӣ Қудрат Давлатзода; сардори сарраёсати маорифи ш. Душанбе Баҳром Исмоилзода; ҳамзамон, сарпарастон – шарикон дар маросими ҷоизасупорӣ иштирок карданд.
Чорабинии мазкурро директори Маркази миллии тестии назди Президенти Ҷумҳурии Тоҷикистон Ҷаъфарзода С.Ф. ифтитоҳ намуда, аз ҷумла қайд кард, ки Маркази миллии тестӣ, дар баробари иҷрои вазифаҳои худ, бо мақсади тарғибу донишандӯзии ҷавонон ва ҳавасманд кардани онҳо аз соли 2018 инҷониб довталабони беҳтаринро муайян ва арҷгузорӣ мекунад. Ҳадафи ҷамъомади имрӯза низ баргузор кардани маросими ҷоизасупорӣ ба беҳтаринҳо дар имтиҳонҳои марказонидаи дохилшавии соли 2022 маҳсуб меёбад. Ҷаъфарзода С.Ф. довталабони беҳтаринро таҳният гуфта, ба онҳо барои таҳсилашон комёбиҳо хост.
Инчунин, ректори Донишгоҳи миллии Тоҷикистон профессор Қобилҷон Хушвахтзода суханронӣ намуда, аз ҷумла қайд кард, ки Маркази миллии тестии назди Президенти Ҷумҳурии Тоҷикистон яке аз дастовардҳои замони соҳибистиқлолии кишвар маҳсуб ёфта, мавриди таваҷҷуҳи Роҳбари давлат, муҳтарам Эмомалӣ Раҳмон қарор дорад. Ҷавонон такя ба саводу малакаи худ карда, тавассути Марказ ба муассисаҳои таълимии таҳсилоти миёна ва олии касбии ҷумҳурӣ дохил мешаванд.
Ёдовар мешавем, ки Марказ аз соли 2018 инҷониб довталабони беҳтаринро, ки дар имтиҳонҳои марказонидаи дохилшавӣ аз рӯйи дастовардҳо – холҳои бадастовардашудаашон дар ҷойи аввал қарор гирифтаанд, муайян ва қадрдонӣ мекунад. Маросими қадр кардани беҳтарин довталабони имтиҳонҳои марказонидаи соли 2022 дар 2 номина сурат гирифт. Номинаи аввал аз ҳар гурӯҳи ихтисосҳо дунафарӣ, яъне 10 нафари беҳтаринро фарогир аст ва номинаи дуюм 17 нафар беҳтаринҳоро, ки аз фанҳои имтиҳонӣ дар доираи фанҳои табиатшиносӣ, дақиқ ва риёзӣ холҳои баландтаринро ба даст овардаанд.
Дар фарҷоми ҷаласа бахши фарҳангии Донишгоҳи миллии Тоҷикистон ба хотири фароғати иштирокдорон барномаи фарҳангӣ пешкаш кард.
