Душанбе, 16 июли соли 2014
Муҳлати пешниҳоди аризаҳо оид ба иҷозат додан ба имтиҳонҳои иловагӣ барои довталабоне, ки бо сабабҳои узрнок дар даврҳои асосии имтиҳонҳо – қисми А (имтиҳони умумӣ) ва қисми Б (имтиҳони ихтисос) иштирок карда натавонистанд 16 июли соли 2014 сипарӣ шуда, бинобар омодагӣ ва оғоз гардидани равандҳои технологии навбатии имтиҳонҳои иловагӣ аризаҳо дигар барои иҷозат додан ба имтиҳонҳои мазкур қабул карда намешаванд.
Имтиҳонҳои иловагӣ барои довталабоне, ки дар хусуси бо сабабҳои узрнок иштирок карда натавонистан қаблан ариза ва ҳуҷҷатҳои тасдиқкунанда пешниҳод кардаанд ва тибқи қарори комиссияи Маркази миллии тестии назди Президенти Ҷумҳурии Тоҷикистон ба имтиҳонҳои иловагӣ иҷозат дода шудаанд, барои ҳамаи кластерҳо дар маркази имтиҳонии № 01/02 рӯзҳои 22 июл (аз рӯйи қисми А) ва 23 июл (аз рӯйи қисми Б) баргузор мегарданд. Чуноне ки аксарият медонанд, тибқи тартиби тасдиқгардида, имтиҳонҳои иловагӣ вобаста ба теъдоди довталабони иҷозатдодашуда танҳо дар марказҳои имтиҳонии шаҳри Душнабе гузаронида мешаванд.
Макони ҷойгиршавии маркази имтиҳонии № 01/02–шаҳри Душанбе, ноҳияи Сино, кӯчаи Исмоили Сомонӣ 59 (мактаби таҳсилоти миёнаи умумии № 25 ноҳияи Синои шаҳри Душанбе, шафати муҷассамаи Абӯалӣ ибни Сино, рӯ ба рӯи Беморхонаи марказии Қаряи Боло).
Довталабон барои воридшавӣ ба маркази имтиҳонӣ бояд бо худ шиноснома ё ҳуҷҷати тасдиқкунандаи шахсият бо сурат ва даъватнома дошта бошанд. Ҳозиршавӣ ба имтиҳон – на дертар аз соати 7:30. Барои истифода дар имтиҳон инчунин ручкаи шаффофи рангаш сиёҳ низ гирифтан лозим аст.
Лозим ба қайд аст, ки имтиҳонҳои иловагӣ тибқи тартиби тасдиқнамудаи Марказ ташкил карда шуда, ҷиҳати таъмини шаффофият ва афзудани боварии ҷомеа нисбати низоми имтиҳонҳои марказонидаи дохилшавӣ имтиҳонҳои иловагӣ таҳти назорати қатъӣ ва ҷиддӣ бо риояи тартиби муқарраргардидаи гузаронидани имтиҳонҳо баргузор шуда, тамоми раванди имтиҳонҳо тавассути камераҳои назорати видеоӣ наворбардорӣ ва сабт карда мешавад.
Дар сурати пайдо шудани саволҳо метавонед бо телефонҳои 224-53-66, 224-53-67, 915-98-00-64 дар тамос шавед.
