Душанбе, 16-уми декабри соли 2022
Маркази миллии тестии назди Президенти Ҷумҳурии Тоҷикистон доираи корҳои иттилоърасониашро вобаста ба имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон густариш медиҳад.
Бо ин мақсад дар мувофиқа бо Вазорати маориф ва илми Ҷумҳурии Тоҷикистон рӯзҳои 14 ва 15 декабри соли 2022 бо иштироки мутахассисони Марказ дар Донишкадаи ҷумҳуриявии такмили ихтисос ва бозомӯзии кормандони соҳаи маориф барои роҳбарони муассисаҳои таълимӣ (директорону муовинони онҳо) ва ҳамчунин, омӯзгорони фанни технологияи информатсионӣ, ки ба курсҳои такмили ихтисоси Донишкада ҷалб гардида буданд, дарсҳои омӯзишӣ баргузор гардид.
Дарс ба масъалаҳои низоми имтиҳонҳои марказонидаи дохилшавӣ бахшида шуд. Дар он, бахусус ба тағйироту навгониҳои ИМД-2023 таваҷҷуҳи махсус зоҳир гардид. Мутахассисони Марказ, дар баробари додани маълумоти мушаххас доир ба низоми ИМД ба суолҳои шунавандагон низ ҷавобҳо гардонида, онҳоро барои ҳамкорӣ даъват намуданд.
Маркази миллии тестии назди Президенти Ҷумҳурии Тоҷикистон ва Донишкадаи ҷумҳуриявии такмили ихтисос ва бозомӯзии кормандони соҳаи маориф тасмим гирифтанд, ки чунин дарсҳоро барои роҳбарони муассисаҳои таълимӣ (директорон ва муовинони онҳо) ва омӯзгорони фаннӣ, ки ба курсҳои такмили ихтисос дар сохторҳои тобеи Донишкада дар шаҳри Душанбе ва вилоятҳо ҷалб мегарданд, низ ба роҳ монанд.
