Бо ташаббуси Ҳукумати Ҷумҳурии Тоҷикистон ва дастгирии бевоситаи Вазорати маорифи Ҷумҳурии Тоҷикистон ҷиҳати фаъолияти пурсамар ва таҳкими иқтидори нерӯҳои кадрӣ дар маҳаллаи “Боғи Айнӣ”‑и шаҳри Душанбе сохтмони бинои нав барои Муассисаи давлатии “Маркази миллии тестӣ” (ММТ) ба анҷом расида истодааст.

Дар доираи ҳамкории судманди Ҳукумати Ҷумҳурии Тоҷикистон ва Ассотсиатсияи байналмилалии рушд соли 2010 Бонки ҷаҳонӣ бо мақсади сохтмон ва муҷаҳҳазгардонии бинои нави ҳозиразамони ММТ, ки дорои шароити зарурӣ ва ҷавобгӯ ба талаботи муосир мебошад, маблағи 2 000 000 (ду миллион) доллари ИМА-ро ҷудо намуд. Сохтмони бинои мазкур ба зиммаи раёсати сохтмони асосии Вазорати маорифи Ҷумҳурии Тоҷикистон бо ҷалби ширкатҳои сохтмонии маҳаллӣ вогузор карда шудааст. Корҳои сохтмонӣ моҳи августи соли 2012 аз ҷониби ширкати сохтмонии ҶДММ “Сари Хосор” оғоз гардида, дар арафаи анҷомёбист.

    Бинои нави ММТ аз ду қисми сеошёна иборат буда, масоҳати умумии он 1823 м²-ро ташкил медиҳад.  Бояд тазаккур дод, ки бо мақсади таъмини бехатарӣ воридшавӣ ба бинои ММТ тариқи корти пластикӣ ба роҳ монда мешавад.  

    Ҳамин тариқ, дар назар аст, ки бинои нави ММТ то ҷашнгирии Рӯзи истиқлолияти давлатии Ҷумҳурии Тоҷикистон ба истифода дода мешавад. Бинои мазкур аз ҷиҳати бехатарӣ вобаста ба ташкил ва гузаронидани имтиҳонҳои марказонидашудаи дохилшавӣ ба муассисаҳои таҳсилоти олии касбии Ҷумҳурии Тоҷикистон ба ҳамаи меъёрҳои муосир ҷавобгӯ мебошад.