Душанбе, 7-уми июни соли 2019
Ба диққати довталабоне, ки дар марҳалаи асосии бақайдгирӣ (аз 1-уми март то 30-юми апрел) барои иштирок дар имтиҳонҳои марказонидаи дохилшавӣ дар соли 2019 аз қайд гузаштаанд, расонида мешавад, ки рӯйхати муассисаҳои таълимии таҳсилоти миёнаи умумие, ки дар заминаи онҳо барои баргузории имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар соли 2019 марказҳои имтиҳонӣ ташкил карда мешаванд, дар сомонаи Марказ ҷой дода шудааст. Ин рӯйхат нишонии ҳар як муассисаи таълимии дар заминаи он маркази имтиҳонӣ ташкилшаванда ва нуқтаи роҳнамо (ориентир)-ро фаро мегирад.
Лозим ба зикр аст, ки рӯйхати чунин муассисаҳо бо фармоиши Вазорати маориф ва илми Ҷумҳурии Тоҷикистон аз 15-уми майи соли 2019, № 2656 тасдиқ гардидааст.
Тибқи рӯйхати мазкур, ки дар асоси таҳлили шумораи умумии хатмкунандагон ва довталабони азқайдгузашта вобаста аз шаҳру ноҳияҳо ҷиҳати таъмини дастрасии осони довталабон таҳия гардидааст, барои имтиҳонсупории довталабон дар 18 шаҳру ноҳияи ҷумҳурӣ 47 маркази имтиҳонӣ ташкил карда мешавад. Бо дарназардошти рӯйхати тасдиқгардида даъватномаҳои довталабони аз 1-уми март то 30-юми апрел номнависшуда омода карда шуда, раванди фиристодани онҳо ба довталабон тибқи макони нишондодаашон дар вақти бақайдгирӣ ва ҷойгир кардани нусхаи электронии онҳо дар кабинетҳои инфиродии довталабон оғоз гардид. Маълумоти мушаххас дар бораи макон ва замони имтиҳонсупории ҳар як довталаб дар даъватномааш қайд шудааст. Маълумоти мазкур барои ҳар як довталаб дар кабинети инфиродияш низ дастрас аст.
Ба довталабон тавсия медиҳем, ки дар бораи нуқтаи роҳнамои маркази имтиҳоние, ки дар даъватномаашон нишон дода шудааст, аз рӯйхати зикргардида маълумот гирифта, бо макони имтиҳонсупориашон пешакӣ шинос шаванд, то ки дар рӯзи имтиҳон дар ёфтани маркази имтиҳонӣ ба мушкил дучор нагарданд. Хотиррасон мекунем, ки даъватнома ба маконе, ки довталаб интихоб кардааст (дар варақаи бақайдгирӣ нишондодашуда), фиристода шуда, гуна (версия)-и электронии он дар кабинети инфиродии довталаб ҷойгир карда шудааст.
Довталаб бояд 1 соату 30 дақиқа пеш аз оғози имтиҳон бо даъватнома, шиноснома ё ҳуҷҷати дигари тасдиқкунандаи шахсияташ (бо муҳр ва сурат) ба маркази имтиҳонӣ аз рӯйи ҷадвали имтиҳонҳо дар рӯзи муайяншуда ҳозир шавад.
