Душанбе, 24-уми ноябри соли 2023
Имрӯз дар маҷлисгоҳи дафтари асосии Маркази миллии тестии назди Президенти Ҷумҳурии Тоҷикистон ба муносибати иди Рӯзи Парчами давлатии Ҷумҳурии Тоҷикистон маҷлиси тантанавӣ баргузор гардид, ки дар он роҳбарият ва кормандони Марказ иштирок карданд. Маҷлиси тантанавӣ бо шунидани Суруди миллӣ оғоз карда шуд.
Маҷлисро директори Марказ Ҷаъфарзода Сабзалӣ Файзалӣ кушода, кормандони Марказро бо иди Рӯзи Парчами давлатии Ҷумҳурии Тоҷикистон табрик кард. Ӯ аз ҷумла, қайд кард, 14 сол аст, ки тоҷикистониён бо шукргузорӣ аз амну ваҳдату офияти кишвар ва бо суруру шодмонӣ Рӯзи Парчами давлатии Ҷумҳурии Тоҷикистонро ботантана ҳамчун гиромидошти яке аз рамзҳои асосии давлатдорӣ таҷлил мекунанд. Акнун рӯзи таърихӣ – Рӯзи Парчами давлатӣ дар кишварамон ба ҷашни нави миллӣ табдил ёфтааст.
Ин ҷашни нави миллӣ ифтихори давлатдорист, эҳтироми муқаддасоти миллист. Эҳтироми Парчами миллӣ эҳтиром нисбат ба миллат, таърих ва муқаддасоти дигари давлатист. Бо мақсади гиромидошти Парчами миллӣ, ҳамчун яке аз муқаддасоти миллӣ ва рамзи давлатдорӣ 19-уми ноябри соли 2009 ба Қонуни Ҷумҳурии Тоҷикистон «Дар бораи рӯзҳои ид» тағйирот ворид гардида, 24-уми ноябр ҳамчун Рӯзи Парчами давлатии Ҷумҳурии Тоҷикистон эълон шуд. Таҷлили рӯзи Парчами миллӣ арҷгузорӣ аз муқаддасоти миллӣ, ифтихори давлатдорӣ ва ватандорӣ маҳсуб меёбад.
Мо, тоҷикон ва тоҷикистониёнро мебояд чун фарзандони як Модар-Ватан, оини парчамдорӣ ва ҳисси эҳтиромамонро нисбат ба Парчам – ин нишону рамзи муҳими давлатдорӣ тақвият бахшем, дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар боби арҷгузорию эҳтироми муқаддасоти миллӣ, муҳаббат ба Ватан ва хидмати сазовор ба он ҳамеша дар ёд дошта, сармашқи кори худ намоем.
Сипас дар атрофи ин мавзуъ маърузаи сармутахассисони фанни таърихи Марказ Абдуллоев Р. С. ва Зарифов Н. Ҳ. ироа гардид.
Дар ин маҷлиси тантанавӣ ба чанде аз кормандони Марказ мукофоти соҳавӣ ва ифтихорномаю сипосномаҳои вазорату идораҳои кишвар низ супорида шуд.
