Душанбе, 20-уми декабри соли 2024
20-уми декабри соли 2024 дар Маркази миллии тестии назди Президенти Ҷумҳурии Тоҷикистон маҷлиси ҳисоботии Кумитаи иттифоқи касабаи кормандони Марказ баргузор гардид.
Дар маҷлис директори Марказ Ҷаъфарзода Сабзалӣ, муовини раиси Иттифоқи касабаи кормандони маориф ва илми Ҷумҳурии Тоҷикистон Қурбонов Муҳаммад Сафарович, раиси Кумитаи иттифоқи касабаи кормандони Марказ Мирзоаминзода Хайрулло ва аъзои иттифоқ иштирок доштанд.
Раиси Кумитаи иттифоқи касабаи кормандони Марказ Мирзоаминзода Хайрулло дар бораи фаъолияти Кумита дар соли 2024 ҳисобот дод. Қайд шуд, ки таҷлили идҳои расмӣ (давлатию миллӣ), иштирок дар чорабиниҳои сиёсӣ, варзишӣ ва фарҳангию фароғатӣ, саҳмгузорӣ дар кумак ба ниёзмандон, ҳавасмандгардонӣ ва қадргузории кормандон, ташкили истироҳати кормандон ва чорабиниҳои солимгардонӣ, таъмини талаботи ҳифзи меҳнат, назорати иҷрои бандҳои шартномаи коллективӣ ва ғайра аз ҷумлаи корҳои анҷомдодаи Кумита дар соли хотимаёбанда буданд.
Дар бораи ба таври шаффоф ба роҳ монда шудани фаъолияти молиявии Кумита ва хароҷоти маблағҳои аз ҳисоби аъзоҳаққӣ ҷамъоваришуда ва масъалаҳои дигари марбут ба он раиси комиссисияи тафтишотии Кумита Рустамов Ҷаъфар маълумот дод.
Баъдан муовини раиси Иттифоқи касабаи кормандони маориф ва илми Ҷумҳурии Тоҷикистон Қурбонов Муҳаммад фаъолияти Кумитаи иттифоқи касабаи кормандони Марказро қаноатбахш арзёбӣ карда, ҳамзамон оид ба боз ҳам беҳбуд бахшидани фаъолияти кории Кумита тавсия ва маслиҳатҳо дод.
Дар охири ҷаласа як нафар корманди Марказ барои фаъолияти арзандааш бо сипосномаи Иттифоқи касабаи кормандони маориф ва илми Ҷумҳурии Тоҷикистон қадр карда шуд.
