Душанбе, 30-юми июли соли 2026
30-юми июли соли 2026 тибқи дастури Роҳбари Дастгоҳи иҷроияи Президенти Ҷумҳурии Тоҷикистон дар дафтари асосии Маркази миллии тестии назди Президенти Ҷумҳурии Тоҷикистон маҷлиси ҳисоботӣ оид ба ҷамъбасти фаъолияти Маркази миллии тестии назди Президенти Ҷумҳурии Тоҷикистон дар нимсолаи якуми соли 2026 баргузор гардид.
Дар ҷаласа директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ, сармутахассиси раёсати маориф, фарҳанг ва иттилооти Дастгоҳи иҷроияи Президенти Ҷумҳурии Тоҷикистон Саъдӣ Шарифзода ва кормандони Марказ иштирок намуданд.
Ҷаласа бо садо додани Суруди миллӣ оғоз шуд.
Сипас ҳисоботи директори Марказ Ҷаъфарзода Сабзалӣ Файзалӣ дар бораи корҳои иттилоърасонию таблиғотӣ, нашри маводди иттилоотию методӣ, ҳамкорӣ бо муассисаҳои таълимии таҳсилоти миёна ва олии касбии Ҷумҳурии Тоҷикистон, ки қабули донишҷӯён ба онҳо тавассути ИМД ба роҳ монда мешавад, бақайдгирии довталабон барои иштирок дар ИМД 2026, ташкилу баргузории давраҳои якум ва дуюми ИМД 2026, тақсимоти довталабон ба муассисаҳои таълимии таҳсилоти миёна ва олии касбӣ, олимпиадаҳои фаннии ҷумҳуриявии хонандагони муассисаҳои таълимии таҳсилоти миёнаи умумӣ, озмунҳо барои дарёфти Стипендияи байналмилалии Президенти Ҷумҳурии Тоҷикистон «Дурахшандагон», инчунин бурсияҳои таҳсилии давлатҳои хориҷӣ, таҳияи саволномаҳо барои озмуни қабули донишҷӯён ба муассисаҳои таълимии таҳсилоти олии касбӣ аз тариқи квотаи Президенти Ҷумҳурии Тоҷикистон, имтиҳонҳои озмоишӣ барои хонандагони синфҳои 11-ум, арзёбии байналмилалии пешрафти саводи хондан – PIRLS ва умуман, оид ба ҳамаи самтҳои фаъолияти Марказ ва дастоварду мушкилоти ҷойдошта дар нимсолаи якуми соли 2026 шунида шуд.
Ҷаъфарзода С. Ф., аз ҷумла зикр намуд, ки яке аз самтҳои асосии фаъолияти Марказ дар оғози ҳар сол корҳои иттилоърасонию таблиғотӣ мебошад. Натиҷаи дурусти бақайдгирӣ ва иштироки довталабон дар ИМД, пеш аз ҳама, аз он вобаста аст, ки довталабон, падару модарон, омӯзгорон ва роҳбарони муассисаҳои таълимӣ то кадом андоза бо тартибу қоидаҳои низом, муҳлатҳои бақайдгирӣ, интихоби ихтисосҳо, талаботи имтиҳонсупорӣ ва тартиби иштирок дар озмуни тақсимот шинос карда шудаанд.
Соли 2026 дастури иттилоотию методии “Роҳнамои довталаб”, ба миқдори 32000 нусха аз ҷумла 30500 нусха ба забони тоҷикӣ ва 1500 нусха ба забони русӣ нашр шуд. Ин дастур барои довталабон яке аз манбаъҳои асосии иттилоот ба шумор рафта, дар он тартиби бақайдгирӣ, интихоби ихтисосҳо, талаботи имтиҳон, меъёрҳои иштирок дар озмуни тақсимот ва дигар маълумоти зарурӣ оварда шудааст. Ҳамчунин, 10 номгӯй маҷмуаи саволу масъалаҳои тести қисми А бо теъдоди 227240 нусха ва 4 номгӯй маҷмуаи саволу масъалаҳои тести қисми Б бо теъдоди 66150 нусха омода ва нашр карда шуд. Илова бар ин, 4052 нусха барнома ва модули курси шиносоӣ бо низоми ИМД ва 4052 дона диск бо маводди иттилоотию методӣ ба муассисаҳои таълимӣ дастрас гардид. Барои нуқтаҳои бақайдгирӣ низ 4145 маводи дигар ба забонҳои тоҷикӣ ва русӣ чоп карда шуд, – гуфт Ҷаъфарзода С. Ф..
Дар идома сармутахассиси раёсати маориф, фарҳанг ва иттилооти Дастгоҳи иҷроияи Президенти Ҷумҳурии Тоҷикистон Саъдӣ Шарифзода ба натиҷаи фаъолияти Марказ баҳои баланд дода, барои беҳбудии бештар бахшидани корҳои Марказ тавсия ва маслиҳатҳо дод.
