Душанбе, 25-уми январи соли 2024
25-уми январи соли 2024 даври дуюми курси шиносоӣ бо низоми имтиҳонҳои марказонидаи дохилшавӣ (ИМД) ба муассисаҳои таълимии таҳсилоти миёна ва олии касбии Ҷумҳурии Тоҷикистон дар 68 шаҳру ноҳияҳои ҷумҳурӣ барои соли 2024 оғоз ёфт.
Курси мазкур тибқи фармоиши вазири маориф ва илми Ҷумҳурии Тоҷикистон аз 9-уми январи соли 2024, № 35 дар давоми ду рӯз – аз 25-ум то 26-уми январ доир мегардад. Дарсҳои шиносоии ИМД-ро 137 нафар таблиғгари сатҳи ҷумҳурӣ, ки дар давоми моҳи январи соли ҷорӣ омӯзиш карда буданд, ташкилу баргузор менамоянд.
Тибқи нақша курсҳои шиносоӣ дар сатҳи дуюм 3799 муассисаи таълимиро, ки дар онҳо хатмкунандагони синфҳои 9-ум ва 11-ум таҳсил доранд, фаро мегиранд. Дар курсҳо зиёда аз 4000 нафар директорон, ҷонишинҳои директорон, омӯзгорон, намояндагони мақомотҳои иҷроияи ҳокимияти давлатӣ ва раёсату шуъбаҳои маориф иштирок мекунанд.
Бояд тазаккур дод, ки сатҳи сеюми курси шиносоӣ тибқи фармоиши вазири маориф ва илми Ҷумҳурии Тоҷикистон аз 1-уми феврали соли ҷорӣ оғоз ёфта, барои зиёда аз 150000 нафар хатмкунандаи муассисаҳои таълимӣ (дар заминаи синфҳои 9-ум ва 11-ум) ба роҳ монда мешавад.
Ҳамзамон, тибқи нақша - чорабиниҳои Марказ оид ба ташкил ва гузаронидани ИМД-2023 аз 1-уми феврал то 5-уми март, дар баробари мониторинги рафти курси шиносоӣ дар сатҳи сеюм, вохӯриҳои кормандони муваққатии Марказ бо хатмкунандагони муассисаҳои таълимии шаҳру ноҳияҳо, омӯзгорон ва падару модарон пешбинӣ шудааст.
