Душанбе, 14-уми январи соли 2016
Дар асоси нақшаи чорабиниҳо оид ба ташкил ва гузаронидани имтиҳонҳои марказонидаи дохилшавӣ (ИМД) ба муассисаҳои таълимии таҳсилоти миёна ва олии касбии Ҷумҳурии Тоҷикистон барои соли таҳсили 2016-2017 аз 18-ум то 20-уми январи соли ҷорӣ курси омӯзиши низоми имтиҳонҳои номбурда барои 100 намояндаи 68 шаҳру ноҳияҳои ҷумҳурӣ баргузор мегардад.
Мақсади чорабинии мазкур омода намудани таблиғгарон барои иттилоърасонию омӯзонидани низоми ИМД ба омӯзгорон ва хатмкунандагони муассисаҳои таълимии таҳсилоти миёнаи умумӣ, таҳсилоти ибтидоӣ ва миёнаи касбӣ ва волидайни онҳо мебошад. Боиси тазаккур аст, ки интихоби таблиғарон дар мувофиқа бо шуъбаҳои маорифи шаҳру ноҳияҳо ва дар асоси озмоиши Марказ сурат мегирад.
Давомнокии курси омӯзиш 12 соат буда, онро кормандони Марказ дар бинои Донишкадаи ҷумҳуриявии такмили ихтисос ва бозомӯзии кормандони соҳаи маориф аз рӯйи дастури иттилоотию методии “Роҳнамои довталаб” ва модул-барномаи омӯзиш мегузаронанд.
Даври дуюми чорабинии мазкур дар сатҳи шаҳру ноҳияҳои ҷумҳурӣ, рӯзҳои 27-ум - 29-уми январ бо иштироки намояндагони муассисаҳои таълимии таҳсилоти миёнаи умумӣ, таҳсилоти ибтидоӣ ва миёнаи касбӣ ва даври сеюм давоми моҳи феврали соли 2016 барои хатмкунандагон ва падару модарони онҳо (дар шакли дарсҳои омӯзишӣ) баргузор хоҳад шуд.
