Душанбе, 2‑юми сентябри соли 2021
2 сентябри соли 2021 дар Маркази миллии тестии назди Президенти Ҷумҳурии Тоҷикистон бахшида ба 30-солагии Истиқлолияти давлатии Ҷумҳурии Тоҷикистон чорабинии идона баргузор гардид, ки дар доираи он якчанд кормандони Марказ бо мукофотҳои давлатӣ ва Ифтихорномаи Ҷумҳурии Тоҷикистон қадрдонӣ гардиданд.
Дар чорабинии мазкур Насриддинзода Эмомалӣ - ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Оқилзода Нурулло мушовири калони бахши ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа ва Хуршед Икромӣ - директори Маркази миллии тестии назди Президенти Ҷумҳурии Тоҷикистон ва дигар кормандони Марказ иштирок ва суханронӣ намуданд.
Нахуст, Хуршед Икромӣ, директори Марказ ҳозиринро ба муносибати 30-юмин солгарди Истиқлоли давлатӣ таҳният гуфта, иброз дошт, ки кормандони Марказ аз таваҷҷуҳу дастгириҳои пайвастаи Асосгузори сулҳу ваҳдати миллӣ - Пешвои муаззами миллат муҳтарам Эмомалӣ Раҳмон ва Ҳукумати кишвар бархӯрдор буда, талош меварзанд, ки содиқонаву софдилона зери сиёсати маорифпарваронаю инсондӯстона ва сулҳҷӯёнаи Президенти кишвар ба халқу Ватан хизмат намоянд.
Насриддинзода Эмомалӣ, ҳамаи кормандони Маркази миллии тестиро ба муносибати 30-юмин солгарди Истиқлолияти давлатӣ таҳният гуфта, иброз дошт, ки ҳамасола аз ҷониби Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон, муҳтарам, Эмомалӣ Раҳмон дар арафаи таҷлили Ҷашни муқаддаси миллӣ - Истиқлолияти давлатӣ бо мукофотҳои давлатӣ, ҷоизаҳо ва унвонҳои фахрӣ сарфароз гардонидани шаҳрвандон нишони олии қадрдонӣ аз заҳмату талошҳои онҳо баҳри пойдории Истиқлолият ва Ваҳдати миллӣ дар кишвар ба ҳисоб меравад. Пешвои миллат, муҳтарам, Эмомалӣ Раҳмон ба фаъолияти Марказ таваҷҷуҳи махсус дошта, ҳамеша барои боз ҳам баланд бардоштани сатҳи хизматрасонӣ дар ин соҳа дастуру ҳидоятҳо медиҳанд.
Ҳамин тавр тибқи Фармони Президенти Ҷумҳурии Тоҷикистон муҳтарам Эмомалӣ Раҳмон ба Шодиев Мирзошариф Сафарович – сардори шуъбаи кор бо муассисаҳои таҳсилоти миёна ва олии касбӣ, Мирзоаминзода Хайрулло Мирзораҳим – сардори шуъбаи банақшагирӣ, мониторинг, пажӯҳиш ва рушд медали “Хизмати шоиста” ва ба Шодиниё Абдулбосит Шодӣ – ёвари директори Маркази миллии тестӣ Ифтихорномаи Ҷумҳурии Тоҷикистон, тақдим гардид.
Дар охир бо мукофотҳои давлатӣ шарафёбшудагон бо эҳсоси ифтихору шодмонӣ аз ин таваҷҷуҳу дастгириҳои Ҳукумати кишвар, хосса Асосгузори сулҳу Ваҳдати миллӣ - Пешвои миллат муҳтарам Эмомалӣ Раҳмон изҳори сипосу қаноатмандӣ намуданд.
