Душанбе, 1‐уми феврали соли 2021

Тибқи нақшаи фаъолияти Маркази миллии тестии назди Президенти Ҷумҳурии Тоҷикистон (Марказ) ва дар ҳамкорӣ бо Вазорати маориф ва илми Ҷумҳурии Тоҷикистон (фармоиши вазири маориф ва илми Ҷумҳурии Тоҷикистон аз 13-уми январи соли 2021, № 69) аз 1-уми феврал то 5-уми марти соли 2021 дар муассисаҳои таълимии таҳсилоти умумии асосӣ, миёнаи умумӣ, ибтидоӣ ва миёнаи касбии шаҳру ноҳияҳои ҷумҳурӣ вохӯриҳои кормандони Марказ бо хатмкунандагон, падару модарон, омӯзгорон ва алоқамандони дигари ба низоми имтиҳонҳои марказонидаи дохилшавӣ-2021 ба нақша гирифта шудааст.

Бо фармоиши директори Марказ 30 нафар корманди Марказ барои ташкилу баргузории вохӯриҳо аз 1-ум то 6-уми феврали соли ҷорӣ ба 68 шаҳру ноҳияи ҷумҳурӣ сафарбар карда мешаванд. Тибқи нақша, дар давоми 6 рӯз кормандони Марказ дар 178 муассисаи таълимӣ бо алоқамандонӣ ИМД вохурию мулоқотҳо хоҳанд кард.

Дар баробари ин, кормандони Марказ ҳангоми сафари хизматӣ ба шаҳру ноҳияҳои ҷумҳурӣ бо мақсади ошноӣ пайдо кардани кормандони мақомотҳои иҷроияи ҳокимияти давлатӣ ва раёсату шуъбаҳои маорифи шаҳру ноҳияҳои ҷумҳурӣ бо онҳо суҳбат карда, маводи иттилоотию методӣ, аз ҷумла дастури иттилоотию методии “Роҳнамои довталаб” ва маҷмӯаи саволу масъалаҳои тестро дастрасашон менамояд.

Инчунин, барои шиносоӣ пайдо кардани аҳли ҷомеаи шаҳру ноҳияҳои ҷумҳурӣ аз тарафи Марказ чунин маводи иттилоотию методӣ ба китобхонаҳо тақдим карда мешаванд, ки дар умум, шумораи маҷъмӯаҳо зиёда аз 500-торо ташкил медиҳад.

Бояд қайд кард, ки дар давоми моҳҳои феврал-марти соли ҷорӣ дар 3683 муассисаи таълимии шаҳру ноҳияҳои ҷумҳурӣ аз тарафи таблиғгарони сатҳи ҷумҳурӣ оид ба низоми ИМД- вохӯриҳо доир карда мешавад, тибқи маълумотҳои пешакӣ дар онҳо зиёда аз 150000 нафар хатмкунанда иштирок меварзанд.