Душанбе, 23-юми декабри соли 2015

Корҳои иттилоърасонӣ барои омодагӣ ба ИМД-2016 аз моҳи ноябри соли ҷорӣ шурӯъ гардид. То имрӯз кормандони Маркази миллии тестии назди Президенти Ҷумҳурии Тоҷикистон дар як қатор муассисаҳои таҳсилоти миёнаи умумии ноҳияҳои шаҳри Душанбе ва шаҳру ноҳияҳои тобеи ҷумҳурӣ корҳои иттилоърасониро анҷом доданд. Чорабиниҳои мазкур бо мақсади дар сатҳи баланди ташкилӣ баргузор намудани имтиҳонҳои марказонидаи дохилшавӣ ба муассисаҳои таҳсилоти миёна ва олии касбӣ дар соли 2016 бо иштироки роҳбарон, омӯзгорон  ва хатмкунандагони муассисаҳои таълимӣ созмон дода шуданд.

Корҳои иттилоотии мазкур дар давоми моҳҳои ноябр ва декабр дар 21 шаҳру ноҳияи ҷумҳурӣ, аз ҷумла, Исмоили Сомонӣ, Сино, Фирдавсӣ, Шоҳмансур, Ваҳдат, Роғун, Турсунзода, Варзоб, Рӯдакӣ, Файзобод, Ҳисор, Шаҳринав, Хуҷанд, Қӯрғонтеппа, Сарбанд, Бохтар, Вахш, Хоруғ, Дарвоз, Роштқалъа ва Шуғнон баргузор карда шуда, дар рафти онҳо дар бораи мавзӯъҳои муҳимми ИМД – интихоби касб ва ихтисос, талаботу тавсияҳо барои интихоби дурусти ихтисосҳо бо назардошти муассисаҳои таълимӣ, шакл ва намуди таҳсил, гурӯҳҳои ихтисосҳо, интихоб ва бартарии интихоб, қисмҳои имтиҳон (А – имтиҳони умумӣ ва Б – имтиҳони ихтисос, имтиҳонҳои эҷодӣ ва ё маҳорати махсус), субтестҳо (фанҳо)-и имтиҳонӣ ва ғайра ба иштирокдорон маълумоти зарурӣ дода шуд. Иштирокдорон ба мавзӯъҳои баёнгардида таваҷҷуҳи зиёд зоҳир карда, дар бораи паҳлуҳои гуногуни онҳо ба кормандони Марказ саволҳо доданд. Мутахассисони Марказ ба ҳар яки онҳо ҷавобҳои мушаххас доданд.

Дар маҷмӯъ, Марказ 277 вохӯрӣ гузаронид, ки дар онҳо 19480 нафар, аз ҷумла, 18216 хонанда ва 1264 омӯзгор ширкат карданд. Айни замон корҳои иттилоърасонӣ идома дорад.